काठमाडौँ । बेलायतका प्रधानमन्त्री बोरिस जोन्सन र अर्थमन्त्री ऋषि सुनकलाई लकडाउनको नियम तोडेको आरोपमा जरिवाना हुने भएको छ ।
बिबिसीका अनुसार २०२० को जुन महिनामा लकडाउन रहेको बेला प्रधानमन्त्री निवासमा भएको पार्टीमा सहभागी भएको आरोपमा प्रधानमन्त्री र अर्थमन्त्रीलाई जरिवानाको नोटिस दिइएको छ ।
कोभिडसम्बन्धि नियम उलंघन विषयमा छानबिन गर्न बनाइएको कमिटी 'मेट' ले जरिवानाको सो नोटिस प्रधानमन्त्री जोन्सन, अर्थमन्त्री सुनक र प्रधानमन्त्री पत्नी क्यारी जोन्सनलाई दिएको बिबिसीले उल्लेख गरेको छ ।
प्रधानमन्त्रीका प्रवक्ताले जरिवानाको नोटिस आएको स्वीकार गरेपनि कुन विषयको भएको प्रष्ट नभएको बताएका छन् ।
मेटले बेलायत सरकारका अधिकारीहरुले कोरोनाको नियम तोडेर ह्वाइटहल र प्रधानमन्त्री कार्यालय डाउनिङ स्ट्रिटमा गरेका १२ पार्टीको अनुसन्धान गरेको थियो ।
गत डिसेम्बरमा यो विषयको खुलासा भएपछि प्रधानमन्त्री जोन्सन अप्ठ्यारोमा परेका थिए । उनले आम जनतासँग माफी मागेपनि दबाबका बीच आफ्नो पद भने बचाएका थिए ।