- २०८१ बैशाख ७ शुक्रबार
काठमाडौँ । चर्चित अमेरिकी अभिनेत्री तथा मानवतावादी काममा सक्रिय मेघन मर्केल बेलायती राजदरबार बकिंघममा भित्रिएकी छिन् ।
संयुक्त अधिराज्यका राजकुमार ह्यारी र अमेरिकी अभिनेत्री मेगन मार्कलबीच एउटा भव्य समारोहमाझ विवाह सम्पन्न भएको हो । विन्ड्सर क्यासलस्थित सेन्ट जोर्जेज च्यापलमा उनीहरूको गत शनिबार विवाह भएको हो ।
मार्कल आफ्नी आमासहित रोल्स रोयस गाडीमा विवाहस्थलमा पुगेकी थिइन् । सेन्ट जोर्जेज च्यापलमा पुगेलगत्तै ह्यारीका पिता युवराज चार्ल्सले मार्कलको हात र्डोयाएर भित्र लगेका थिए । ह्यारी भने आफ्ना दाजु विलियमसँगै विवाहस्थलमा पुगेका थिए । वैवाहिक समारोहमा छ सय जना पाहुना उपस्थित थिए ।
कतिपयले राम्रो दृश्य देख्न सकियोस् भनेर केही दिनअगाडि देखि नै त्यस्ता सम्भावित स्थलमा पाल टाँगेर बसेका थिए । यसअघि विवाहपछि ह्यारी र मार्कलको जोडी ससेक्सका ‘ड्युक र डचेस’ का रुपमा चिनिने घोषणा गरिएको थियो ।
समारोहमा सहभागी हुन नेताहरू निमन्त्रणा दिइएको थिएन । प्रधानमन्त्री टरिजा मेले राजकुमार ह्यारी र मर्कललाई सामाजिक सञ्जाल ट्विटरमार्फत् शुभकामना दिएकी थिइन् ।
३६ वर्षकी अमेरिकी कलाकार मर्केल श्वेताश्वेत (मिश्रित) मूलकी हुन् । उनी राजकुमार ह्यारीसँग प्रेममा परेकी थिइन् । बेलायती राजप्रासादले भित्र्याएसँगै बेलायती राजपरम्पराकै लागि यो इतिहास बनेको छ । किनकि दरबारमा अश्वेत आमाबाट जन्मिएकी नारीले पहिलोपटक राजकुमारी बन्ने अवसर पाएकी हुन् ।
आफ्नो हलिउड-सेलिब्रेटी जीवन र सामान्य व्यक्तिगत जीवनलाई सन्तुलनमा राख्न सफल यी कलाकार विश्वकै शक्तिशाली देशको राजकुमारले प्रेम प्रस्ताव राख्ने स्थितिसम्म आउनुलाई मानिसहरुले रोचक रुपमा लिएका छन् ।
को हुन् मर्केल ?
राजकुमार ह्यारीसँगको प्रेममा परेसँगै अंग्रेजी अनलाइन तथा पत्रपत्रिकामा आफ्ना तस्बिरहरु कैद गराउन सफल मर्केल एक अमेरिकी नागरिक हुन् । सन् १९८१ अगष्ट ४ मा अमेरिकाको क्यालिफोर्नियास्थित लस एन्जल्समा जन्मिएकी मर्केलको पूरा नाम रचेल मेघान मर्केल हो । एक्ट्रेस, मोडल र ह्युमेनिटेरियनको रुपमा संसारलाई चिनाएकी मर्केलले सन् २००२ देखि २०१७ सम्म आफ्नो सक्रिय जीवनलाई अगाडि बढाइरहेकी थिइन् । आफूलाई बहुप्रतिभाशाली बनाउने क्रममा उनले कलाकार, मोडल र मानवसेवालाई जोड दिँदै आएकी थिइन् । बेलायती राजकुमारसँगको प्रेममा परेपछि मिडियाले उनलाई खोज्न थालेको हो । दुवैको कर्मवाद मिल्दोजुल्दो भए पनि बेलायती दरबारमा उनको प्रवेश एउटा ऐतिहासिक रुपमा भएको छ ।
एउटा हलिउड सपनाबाज
अमेरिकाको लस एन्जल्सनिवासी यी कलाकार बाबु थोमस मर्केल र आमा डोरिया रगल्याण्डको कोखबाट जन्मिएकी हुन् । यद्यपि उनको बुबाआमाको वैवाहिक जीवन उनी सानै छँदैमा टुक्रिएको थियो । तर त्यसले मर्केललाई कलाकार बन्न असर गरेन । उनले परिवारबाट सहायोग र सद्भाव पाइरहिन् । उनले लेख्ने कला सिक्दै गइन् भने एउटा रेष्टुरेन्टमा अतिथिसेविका भएर पनि काम गरिरहेकी थिइन्, जुन कलाकार बन्नका लागि अत्यावश्यक थियो ।
त्यसबेलासम्म उनले ‘सीएसआई : मिआमी’, ‘९०२१०’ र ‘जनरल हस्पिटल’ जस्ता फिल्मले उनलाई अभिनय गर्ने आधार दिएको थियो । त्यसमा उनले थोरै भए पनि अभिनय गर्ने स्थान पाइन् । यसका अतिरिक्त ‘रिमेम्बर मि’ र ‘हरिबल बोसेस’ मा पनि उनले अभिनय जारी राखिन् । त्यसपछि ब्रेकथ्रु नै भयो उनको भूमिका सन् २०११ मा जब उनले ‘सुट्स’ नामको टिभी सिरिजमा काम पाइन् । अहिले यो शोको सातौँ सिजन चलिरहेको छ ।
‘बाइ-रेसियल’ मूल
सन् २०१५ मा फेसन, सुन्दरता, मनोरञ्जन र स्वास्थ्यसम्बन्धी म्यागजिन एल्ले युकेका लागि निबन्ध लेखेकी मर्केलले एउटा बाइ रेसियल (दुई छुट्टाछुट्टै जातिका बाबुआमाबाट जन्मिएको) कलाकारका रुपमा उसले जीवनमा भोग्नुपर्ने अप्ठ्याराहरु शब्दमा उतारेकी थिइन् । उनी अश्वेतमूलकी आमा र श्वेतमूलका बाबुबाट जन्मिएकी थिइन् । सोही कारण उनको परिवारले जीवनमा आउने कठिनाइहरुबारे सानैदेखि तम्तयार पार्ने कोसिस गरेको थियो ।
महिलावादी टिभी स्टारडम
संसारकै शक्तिशाली दरबारको एक सदस्य बनेकी मेघन एक महिलावादी नारीका रुपमा समेत चिनिन्छिन् । उनलाई उनके साइकोथेरापिष्ट र योग सिकाउने आमाले ‘कसरी ग्लोबल सिटिजन (विश्वकै नागरिक) बन्ने’ भनेर प्रशिक्षित गरेको उनले २०१६ मा एल्लेमा लेखेकी छिन् ।
मर्केलले लैंगिक समानताको लागि आफ्नो टिभी स्टारडमलाई नै आधार बनाएर क्लिन वाटर क्याम्पेन, दासमुक्त आधुनिक समाजजस्ता रचनात्मक आन्दोलनहरु चलाएकी थिइन् । उनी आफू नारी र नारीवादी भएको भन्दै मर्केलले संयुक्त राष्ट्रसंघको राजनीतिक सहभागिता र नेतृत्वका लागि महिला वकालत भन्ने विषयमा सन् २०१५ को अन्तर्रा्ष्ट्रिय नारी दिवसको अवसरमा राष्ट्रसंघीय सम्मेलनमा भाषण गरेकी थिइन् ।
उनी सानैदेखि जेन्डर इक्वेलिटी (लैंगिक समानता)को वकालत गर्थिन् । स्कुले जीवनमा उनले आफूलाई दुई जना केटा साथीले केटी (महिला)हरु खालि भान्सासँग मात्रै सम्बन्धित रहेको भन्दा उनी निकै रिसाएको बताउँछिन् मर्केल । त्यतिबेला उनी तत्कालै प्रतिवादमा उत्रिएकी थिइन् । यसले पनि उनी सानैदेखि कति ‘सिरियस’ थिइन् भन्ने देखाउँछ । बुबाकै सल्लाहमा उनले एक जना साबुन उत्पादक र गत वर्षको राष्ट्रपतीय चुनावी मैदानमा पराजित हिलारी क्लिन्टनलाई समेत चिठी पठाएकी थिइन् । एकपटक उनकै प्रयासमा ‘महिलाविरोधी विज्ञापन’मा प्रयोग भएको ‘वुमन’ शब्दको ठाउँमा ‘पिपल’ राखिएपछि यसले उनलाई थप हौसला दियो । त्यसो त मर्केलले लेडी गागासँग स्वरमा स्वर मिलाउँदै ‘शिक्षामा महिलाअधिकार’ व्यावहारिक रुपमै हुनुपर्ने माग गरेकी थिइन् ।
समाजसेवी मर्केललाई समाजसेवक नै जीवनसाथी
मानव सेवामा रम्न चाहने यी अमेरिकी अभिनेत्रीले भविष्यमा समेत आफ्नो कामलाई साथ दिने समाजसेवकलाई आफ्नो जीवन साथी बनाउन सफल भइन् । उनका श्रीमान् अर्थात् प्रिन्स ह्यारी पनि समाज सेवा गर्न रुचाउने राजकुमार हुन् । सन् २००६ मा ह्यारीले अफ्रिकाको लेसोथोमा टुहुरा र असहायको सहायोगका लागि च्यारिटी आयोजना गरेका थिए । त्यहाँ उनले महिला, रोगी र घाइतेहरुको लागि सहयोग अभियान चलाएका थिए । आफ्नो आमा डायनाले जस्तै एड्स र एचआईभीपीडितका लागि ह्यारीले सहयोग गर्दै आएका छन् ।
ह्यारीद्वारा प्रशंसित
ह्यारीले इन्गेजमेन्टपछि मिडियासँग कुरा गर्दै अघिल्लो वर्ष मर्केललाई कपेबल अफ एनिथिंग अर्थात् हरेक काम गर्नसक्ने क्षमतायुक्त भनी प्रशंसा गरेका थिए । ह्यारीले आफूहरु दुवै परिवर्तनका लागि आफूहरुको एउटै प्यासन (लगाव) भएको र त्यो परिवर्तन असल कामका लागि भएको समेत बताएका थिए । यो कुराले यो जोडीको पूर्णता पनि पुष्टि गर्छ ।
विवाहसँगै मर्केल शक्तिशाली दरबारको एक महत्वपूर्ण सदस्य बनेकी हुन् ।
दोस्रो विवाह
विवाह हुनुअघि मर्केलले आफूहरु दुवै एकअर्काप्रति प्रेममा रहेको र यसबाट निकै खुसी रहेको बताएकी थिइन् । यद्यपि मर्केलको भने यो दोस्रो विवाह हो । यसअघि एक फिल्म निर्माता ट्रेभर एन्जेल्सनसँग विवाह भएको मर्केलको वैवाहिक जीवन २ वर्षसम्म टिकेको थियो । उनीहरुबीच सन् २०१३ मा सम्बन्धविच्छेद भएको थियो ।
...र त्यो ‘ब्लाइन्ड डेट’
मर्केलले सन् २०१६ मा आफ्नो साथीमार्फत प्रिन्स ह्यारीलाई भेटेकी थिइन् । उनीहरुका लागि कुनै साथीले मध्यस्थकर्ता भएर ‘ब्लाइन्ड डेट’ आयोजना गरिएको थियो । गत नोभेम्बरको अन्तिमतिर सार्वजनिक रुपमा प्रिन्स ह्यारीले सम्बन्ध खोल्नुअघि नै उनीहरु गोप्य भेटमा थिए । सम्बन्ध गाँसिएको १ वर्षपछि मात्रै मर्केलले ह्यारीसँगको आफ्नो सम्बन्धबारे खुलाएकी थिइन् । उनले भनेकी थिइन्, ‘हामी दुई एक अर्काप्रति प्रेममा र खुसी छौँ ।’
सीएनएन र बीबीसीको सहयोगमा ।
