काठमाडौं । नेपाली सेना र अमेरिकी इन्डोप्यासिफिक कमान्ड डिरेक्टोरेट अफ इन्टेलिजेन्सको संयुक्त आयोजनामा एसिया प्यासिफिक इन्टेलिजेन्स चिफ्स कन्फरेन्स काठमाडौंमा सुरु भएको छ ।
सोमबारबाट सुरु ११औँ सम्मेलनको कामु प्रधानसेनापति रथी पूर्णचन्द्र थापाले होटल हायातमा उद्घाटन गरेका हुन् ।
यस्तो सम्मेलन नेपालमा पहिलोपटक सञ्चालन भएको हो । सम्मेलनमा २३ राष्ट्रहरुका उच्च तहका सैनिक अधिकृतहरु ८३ र नेपाली सेनाको तर्फबाट २० जना गरी जम्मा १०३ जनाको सहभागिता रहेको नेपाली सेनाले जनाएको छ ।
सम्मेलन २० गतेसम्म सञ्चालन हुनेछ । सहभागी हुन आएका उच्च तहका विदेशी सैनिकहरुलाई नेपालका विभिन्न पर्यटकीय स्थलहरुको भ्रमण गराउने कार्यक्रम समेत रहेको छ ।
यसप्रकारका सम्मेलनले वर्तमान र भविष्यमा उत्पन्न हुन सक्ने रणनैतिक सुरक्षा चुनौतीको समाधानमा सघाउ पुग्ने सेनाको विश्वास छ । उद्घाटन समारोहमा नेपाली सेनाका रथीवृन्दहरु, रक्षा मन्त्रालयका प्रतिनिधि तथा अधिकृतहरुको समेत उपस्थिति रहेको थियो ।