काठमाडौँ। संसदीय सुनुवाइ समितिले अख्तियारको प्रमुख आयुक्तमा प्रस्तावित नवीनकुमार घिमिरेविरूद्ध उजुरी गर्न सुचना प्रकाशित गरेको छ।
संवैधानिक परिषद्ले गत २० गते कार्यबाहक प्रमुख आयुक्त घिमिरेलाई प्रमुख आयुक्तमा सिफारिस गरेको थियो । समितिले असोज १ गतेभित्र समिति समक्ष सोझै उपस्थित भएर अथवा जिल्ला प्रशासन कार्यालयमार्फत् उजुरी पठाउन सूचना प्रकाशित गरेको हो।
समितिले उजुरीमा नाम थर, वतन र सम्पर्क माध्यम खुलाउनुपर्ने जनाएको छ। यद्यपी उजुरीकर्ताले चाहेमा गोप्य राखिदिने जनाएको छ।
समितिले इमेलबाट समेत उजुरी लिँदै आएको छ। समितिको इमेल [email protected] मा उजुरी गर्न सकिने जनाएको छ।
प्रमुख आयुक्तमा सिफारिस घिमिरे यसअघि रक्षा र गृहसचिव भैसकेका छन्। २०७१ सालमा उनी अख्तियारको आयुक्त बनेका थिए। दीप बस्न्यातले अवकाश पाएपछि गत फागुन १ देखि अख्तियारको कार्यवाहक प्रमुखको रुपमा घिमिरेले काम गर्दै आएका छन्।