- २०८१ बैशाख ७ शुक्रबार
काठमाडौँ। श्रम, रोजगार तथा सामाजिक सुरक्षामन्त्री गोकर्णराज विष्टले वैदेशिक रोजगारीलाई सुरक्षित, व्यवस्थित र मर्यादित बनाउन प्रविधिगत सुधार गरी एकीकृत सफ्टवेयर प्रणाली कार्यान्वयनमा ल्याइएको बताएका छन् ।
एकीकृत वैदेशिक रोजगार सूचना व्यवस्थापन प्रणाली र मोबाइल एप्सको शुभारम्भ गर्दै उहाँले वैदेशिक रोजगारीलाई सरल, सहज र पारदर्शी बनाउन सरकार सधँै प्रयत्नशील रहेको बताए । आफूले श्रम मन्त्रालयको जिम्मेवारी सम्हालेपछि यस क्षेत्रका समस्या समाधानका लागि सरोकारवाला पक्षसँग लिइएको सुझावका आधारमा अनलाइन प्रणालीको विकास गरिएको बताए ।
परराष्ट्र, गृह र स्वास्थ्य मन्त्रालयलगायत सरोकारवाला पक्षसँगको पटकपटकको छलफलपछि यस प्रणालीलाई कार्यान्वयनमा ल्याइएको उनको भनाइ थियो । लामो समयदेखि वैदेशिक रोजगारीका क्षेत्रमा विकृति, विसङ्गति कायम रहेको उल्लेख गर्दै उनले विद्यमान समस्याको समाधान खोज्दै सरकारले नीतिगत र कानूनी सुधार गर्दै आएको बताए ।
उहाँले वैदेशिक रोजगारीको क्षेत्रलाई सूचना प्रणालीले व्यवस्थित, पारदर्शी र समस्यारहित बनाउन महत्वपूर्ण सहयोग पु¥याउने विश्वास व्यक्त गर्दै वैदेशिक रोजगारीमा गएका र फर्कने व्यक्तिको तथ्याङ्कलाई अद्यावधिक गर्न सहज हुने बताए।
मन्त्री विष्टले भने, “वैदेशिक रोजगारीमा देखिएका समस्या समाधान गर्न विभिन्न नीति, कानून परिमार्जन गर्न सफ्टवेयरले मद्धत गर्नेछ, नयाँ ढङ्गबाट नीति निर्माण गर्न सहयोग मिल्नेछ, वैदेशिक रोजगार व्यवसायी, अभिमुखीकरण तालीम प्रदायक संस्था, बीमा तथा बैङ्कलगायत संस्थासँगको समन्वयले संस्थागत विकासमा टेवा पुग्नेछ ।”
वैदेशिक रोजगारीमा देखिएका समस्या समाधान खोज्नु हामी सबैको साझा चाहना र प्रतिबद्धता भएको बताउँदै उनले भने, “एकीकृत प्रणालीले बाङ्गिएको नियतलाई सोझो बनाउन सहयोग पु¥याउने छ, यसको कार्यान्वयनपछि प्राप्त हुने सफलताले वैदेशिक रोजगारीलाई व्यवस्थित बनाउनेछ ।”
सो अवसरमा श्रम मन्त्रालयका सचिव महेश दाहालले वैदेशिक रोजगारीलाई व्यवस्थित बनाउन एकीकृत सूचना प्रणालीको महत्वपूर्ण भूमिका हुने भन्दै यसलाई समयसापेक्ष परिमार्जन गरेर लैजान सकिने बताए । उनले सफ्टवेयरको पूर्ण कार्यान्वयनमा सबै पक्षको सहयोगको आवश्यकतामा जोड दिए ।
अध्यागमन विभागका महानिर्देशक ईश्वरराज पौडेल र राहदानी विभागका महानिर्देशक काजीराम खड्काले सफ्टवेयरको कार्यान्वयनलाई सफल बनाउन विभागका तर्फबाट सक्दो सहयोग गर्ने प्रतिबद्धता व्यक्त गरे।
वैदेशिक रोजगार व्यवसायी महासङ्घका अध्यक्ष रोहन गुरुङले अनलाइन प्रणालीले वैदेशिक रोजगारलाई व्यवस्थित बनाउने विश्वास गर्दै यसको कार्यान्वयनका लागि महासङ्घका तर्फबाट कुनै कसर बाँकी नराख्ने प्रतिबद्धता व्यक्त गरे ।
स्वीस सरकारको सहयोगमा उक्त एकीकृत सूचना व्यवस्थापन प्रणाली निर्माण गरिएको हो । उक्त सूचना प्रणालीमा अध्यागमन विभाग, रहदानी विभाग, नेपाली दूतावास÷कूटनीतिक नियोग र कन्सुलर विगाभको तथ्याङ्कलाई एकीकृत गरिएको छ । एकीकृत सूचना व्यवस्थापन प्रणाली आगामी असोज १५ गतेदेखि कार्यान्वयनमा ल्याइने मन्त्रालयले जनाएको छ ।
