सिन्धुली । जिल्लामा सुरक्षित गर्भपतनको लागि सञ्चारमाध्यमको भूमिका विषयक अन्तर्क्रिया कार्यक्रम सम्पन्न भएको छ ।
ग्रामीण महिला संजाल नेपाल रुओनले आयोजना गरेको अन्तर्क्रिया कार्यक्रममा सुरक्षित गर्भपतन, नेपालमा गर्भपतनको अवस्था र सुरक्षित गर्भपतनको लागि सञ्चारमाध्यमले खेल्न सक्ने भुमिकाको बारेमा छलफल गरिएको थियो ।
कार्यक्रममा बीबीसीकी कार्यक्रम संयोजक सनिला गुरुङ र कार्यक्रम अधिकृत एलिजा सिंहले सुरक्षित गर्भपतन तथा प्रजनन स्वास्थ्यमा सञ्चारमाध्यमले महत्वपूर्ण भूमिका खेलेको बताउँदै अगामी दिनमा अझै सूचना प्रवाहको दायरालाइ अझ फराकिलो बनाउन आग्रह गरेका छन् ।
प्रजनन स्वास्थ्यमा एक महिला मात्र नभएर सम्पूर्ण परिवारले नै जानकारी लिनुपर्नेमा उनीहरुले जोड दिँदै गर्भपतनलाई समस्याको समाधानको रुपमा नभइ विकल्पको रुपमा लिन उनीहरुले आग्रह गरे ।
सुरक्षित गर्भपतनको लागि जनचेतना अभिवृद्धि गर्न सञ्चारमाध्यमले महत्वपूर्ण भूमिका खेलेको बताउँदै कार्यक्रमपश्चात् गर्भपतनको विषयमा थप सूचना प्रवाह हुने सहभागीहरुले बताए ।
रुओन नेपालकी कार्यक्रम अधिकृत सम्झना पहाडीले रुओन नेपालले महिला सशक्तीकरण र बालबालिकाको क्षेत्रमा लामो समयदेखि काम गर्दै आएको र सन् २०२० सम्ममा सुरक्षित गर्भपनको बारेमा जानकारी गराई सुरक्षित गर्भपतनको लागि विभिन्न जिल्लाहरुमा रुओनले कार्यक्रम संचालन गदै आएको बताइन् ।
कार्यक्रममा नेपालसहित विभिन्न देशको गर्भपतनको अवस्था, सुरक्षित गर्भपतनको गराउनेको तथ्यांक र समाजमा लगाइने लाञ्छना लगायतका विषय समेटिएको भिडियो समेत देखाइएको थियो ।