- २०८१ बैशाख ७ शुक्रबार
काठमाडौँ। एभरेष्ट प्रिमियर लिग (इपिएल) को फाइनल खेलमा ललितपुर प्याट्रीयटसले भैरहवा ग्लाडियटर्सलाई १४ रनले पराजित गर्दै इपिएलको उपाधि जितेको छ। ललितपुरले दिएको १५६ रनको लक्ष्य पछाएको भैरहवाले २० ओभरमा ९ विकेट गुमाउदै १४१ रन बनाएको थियो ।
ललितपुरका बलर ललित राजबंशीले सर्वाधिक ३ विकेट लिए। ललितले ४ ओभरमा १७ रन दिएर ३ विकेट लिएका थिए। त्यस्तै पवन सराफ र योगेन्द्र सिंह कार्कीले २-२ विकेट लिएका थिए।
भैरहवाका लागि प्रदीप सिंह ऐरीले ३४ रन बनाए भने रवि इन्दर सिंहले २९ रन बनाए। त्यस्तै कप्तान शरद भेस्वाकर र रायन टेन डेओसचेटले १४-१४ रन बनाएका थिए। त्यस्तै आरिफ सेखले १२, मोहमद नाविदले १० रनको योगदान दिए। त्यस्तै कुशल मल्लले १६ रन बनाए भने रोहित पौडेलले ७ रन बनाएका थिए।
यसअघि टस हारेर पहिला ब्याटिंग गरेको लालितपुरले १९.१ ओभरमा सबै विकेट गुमाउदै १५५ रन बनाएको थियो ।
ललितपुरले राम्रो सुरुवात गर्दै लागि ४१ रनको साझेदारी गरेको थियो। ललितपुरका लागि भारतीय खेलाडी गौरव तोमार २३ रनको निजी रनमा आउट भएका थिए।
ललितपुरका भारतीय खेलाडी जयकिसन कोलसावालाले उत्कृष्ट ब्याटिंग गर्दै ५७ रन बनाएका थिए। कोलसवालाले ५१ बल खेल्दै ३ छक्का र ३ चौकाको मद्धतले ५७ रन बनाएका थिए।
तोमार आउट भएपछि कप्तान ज्ञानेन्द्र मल्ल १० रन बनाएर आउट भएका थिए। त्यसपछि आएका पवन सराफ दुर्भाग्यपूर्ण रुपमा ५ रन बनाएर बलर अविनाश बोहोराबाट रन आउट भएका थिए।
त्यसपछि क्रिजमा आएका सन्दीप जोराले केहि उत्कृष्ट शट खेल्दै ११ बलमा २४ रन बनाएर आउट भएका थिए। सन्दीपले २ छक्का र एक चौका हानेका थिए।
भारतीय बलर सन्नी पटेल भने केवल एक रन बनाएर आउट भएका थिए। ललितपुरका लागि कुशल भुर्तेलले ११ रन, सोनु तामांगले २ रन र रसिद खान शुन्यमा आउट भएका थिए ।
त्यस्तै भैरहवाका बलर कृष्ण कार्कीले सर्वाधिक ३ विकेट लिएका थिए। कृष्णले कोलसवाला, पटेल र भुर्तेलको विकेट लिएका थिए। त्यस्तै मोहमद नावीद र रायन टेन डोएसचेटले २-२ विकेट लिएका थिए भने शरद भेस्वाकर, भुवन कार्कीले एक एक विकेट लिएका थिए।
