- २०८१ बैशाख ४ मंगलबार
काठमाडौँ । जापान सरकारले नेपाली श्रमिकलाई रोजगारीका अवसर प्रदान गर्ने निर्णय गरेसँगै नेपाल र जापानबीचको द्विपक्षीय छलफलले तीव्रता पाएको छ ।
जापानी प्रतिनिधिमण्डलसँगको छलफलमा नेपालले पारदर्शी र प्रतिस्पर्धी पद्धतिबाट उपयुक्त विधि, प्रणाली र संयन्त्रको विकास गरी आप्रवासनका क्षेत्रमा विश्वव्यापी रुपमा स्थापित भएका नवीनतम् मान्यता एवं मापदण्डअनुरुप श्रमिक पठाउने विषयमा जोड दिइएको श्रम, रोजगार तथा सामाजिक सुरक्षा मन्त्रालयले जनाएको छ ।
आगामी दिनमा द्विपक्षीय संवादलाई निरन्तरता दिँदै उच्चस्तरको समझदारी गरी छिट्टै नेपाली श्रमिकले नयाँ व्यवस्थाअनुरुप जापानमा काम गर्न पाउने वातावरणको सिर्जना गर्न दुवै देशले थप गृहकार्य गर्ने सहमतिसमेत भएको श्रम मन्त्रालयका प्रवक्ता डा नारायण रेग्मीले जानकारी दिए ।
छलफलका क्रममा नेपाली कामदारले जापानमा सिकेको ज्ञान, सीप र अनुभवलाई उद्यमशीलताको माध्यममार्फत नेपालको विकासमा योगदान पु¥याउने वातावरणको सिर्जना गरी दुवै देशले सहकार्य गर्दै जाने सहमतिसमेत भएको छ । छलफलको क्रममा जापानको अध्यागमनसम्बन्धी संशोधित कानूनी व्यवस्थाअनुसार विदेशी श्रमिकको व्यवस्थापन गर्ने सम्बन्धमा जापान सरकारबाट जारी भएका नयाँ कानूनी प्रावधान जापानी पक्षबाट जानकारी लिइएको मन्त्रालयले जनाएको छ ।
व्यवस्थित, सुरक्षित र मर्यादित रुपमा नेपाली श्रमिक जापानमा पठाउने सन्दर्भमा पारस्परिक हित प्रवर्धन हुने गरी समझदारी कायम गर्नेलगायत श्रमिक आप्रवासनका विविध आयाममा छलफल भएको प्रवक्ता रेग्मीले जानकारी दिए ।
