- २०८१ बैशाख ७ शुक्रबार
विसं २००७ सालदेखि बीपी कोइरालाले सुरु गरेको समाजवादी आन्दोलन होस् या पुप्पलाल, मदन भण्डारी हुँदै पछिल्लो चरणमा पुष्पकमल, बाबुराम भट्टराईले सुरु गरेको साम्यवादी आन्दोलन, लक्ष्य एउटै थियो, समृद्ध मुलुक र नागरिकको जीवनस्तर सुदृढ गराउने ।
मुलुक र नागरिकको जीवन सहज र सम्पन्न बनाउने लक्ष्यमा शाही शासक नै भए पनि महेन्द्र तथा वीरेन्द्रको योगदानलाई समेत कम आँक्न मिल्दैन । तर, समय भन्नु वा नियतिको खेल बीपी र पुष्पलाल आफ्नो जीवनकालमा आफ्नो सपनाले कुनै पनि मुर्तरुप लिन नपाई परलोक भए, मदन भण्डारी र राजा वीरेन्द्रलाई उनीहरुको सपनाले साकार रुप लिन नपाउँदै षड्यन्त्रपूर्वक ढंगले मारियो । पछिल्लो साम्यवादी आन्दोलनका अगुवा पुष्पकमल र बाबुराम हजारौं जनताको बलिदानीलाई सत्ताप्राप्तिको भर्याङ बनाएर व्यक्तिगत रुपमै भए पनि समृद्ध जीवन बाँचिरहेका छन् ।
हुन त बीपी, पुष्पलाल, मदन भण्डारी, महेन्द्र र वीरेन्द्रका अनुयायी अहिले पनि छन् । यिनीहरुलाई नै आदर्श मान्दै अहिले पनि राजनीतिको व्यापार चलिरहेकै छ । तर, उनीहरुलाई आदर्श मान्नेहरु जनतामा भ्रम छर्दै आफ्नो राजनीतिक व्यापार चलाउने र व्यक्तिगत स्वार्थ पूरा गर्नमै व्यस्त छन् । बीपी, पुष्पलाल, मदन भण्डारी, राजा महेन्द्र र वीरेन्द्रले देखेको समृद्ध नेपाल र सम्पन्न नागरिकको सपना मृतप्रायः बनेको छ । बाँकी छन् त खोक्रा आश्वासन, जर्जर मुलुक, अभाव र दुःखमा पिल्सिएका नेपाली जनता ।
लेखक : बिशाल पाण्डे
हामी सिद्धान्ततः सात दशकदेखि समृद्धि र सम्पन्नताका कुरा गरिरहेका छौँ, सपनामा समाजवाददेखि साम्यवाद पनि ल्याइसक्यौं तर व्यवहारमा रु अहिले पनि सात दशक पहिलेकै अवस्थामा छाँै । समृद्धि र सम्पन्नताको आश्वासन सुन्दासुन्दै एउटा पुस्ताको पूरै जीवन सकिसकेको छ, अर्को पुस्ता त्यही प्रवृत्तिको शिकार हुँदै पलायन हुन बाध्य बनिरहेको छ । तर, हाम्रो राजनीतिक नेतृत्वलाई सात दशक पुरानो उधारो सपना बाँड्ने प्रवृत्तिले अहिले पनि छोडेको छैन । तर, सधैंभर उधारो आश्वासनले मात्र राजनीतिक व्यापार चल्ने अवस्था कम्तीमा पनि अब छैन । मुलुकको विकास र समृद्धिको लागि धेरै ढिला भइसकेको छ । र, जनताको मुहारमा खुशी ल्याउँदै मुलुकको समृद्धिमा इँट्टा थप्नका लागि अमुक सिद्धान्तको पछि लाग्नु पर्दैन भन्ने कुरा एउटा व्यक्तिको प्रयासबाट सुरु भइसकेको छ ।
भूकम्प जस्तो प्राकृतिक विपत्तिको चपेटामा परेका नागरिकलाई अढाई वर्षभन्दा बढी हुँदा समेत सिद्धान्तबाट निर्दे्शित दल र उनीहरुले नेतृत्व गरेको राज्यले एउटा सानो बस्ती व्यवस्थापनसमेत गर्न नसक्दा एउटा व्यक्तिले सुरु गरेको अभियानले एक वर्ष्भित्रमा तीन-तीनवटा बस्ती निर्माण भएका छन् । राज्यले मुलुक चिनाउन नसकिरहेको बेला एउटा व्यक्तिको प्रयासले सम्पूर्ण मुलुकलाई एउटै स्थानबाट चिनाउने ठूलो परियोजना विकासको अभियानको थालनी भएको छ ।
राज्यले मुलुक चिनाउन नसकिरहेको बेला एउटा व्यक्तिको प्रयासले सम्पूर्ण मुलुकलाई एउटै स्थानबाट चिनाउने ठूलो परियोजना विकासको अभियानको थालनी भएको छ ।
बाढीको चपेटामा परेको तराई क्षेत्रमा राज्य नपुग्दै राहतसहित नागरिकमा आशाको दियो बोकेर एक जना व्यक्ति पुग्छ । व्यक्तिगत फाइदाका लागि सबै सिद्धान्तलाई बेच्ने सामाजिक परिवेशका अगाडि खाइपाइ आएको पेशालाई छाडेर एउटा व्यक्ति जनताको सेवामा खटिरहेको छ । राजनीतिका आडमा हिमाल, पहाड, तराई, जात, धर्म र भूगोलकाबीचमा खाडल बनाइरहेका कथित राजनीतिक व्यापारीका बीचमा सबै क्षेत्रलाई जोड्ने पुल बनिरहेको छ । सिद्धान्तको व्यापार हुने मुुलुकमा एउटा व्यक्तिको प्रयासले ठूलो उपलब्धि भइरहेको छ ।
हरेक क्षेत्रमा देखिएको निराशालाई चिर्दै आशाको दियो बाल्ने कलाकार सीताराम कट्टेल ‘धुर्मुस’को अभियानको जति धेरै प्रशंसा गरे पनि कमी हुन्छ । आज सीताराम मुलुकको आशा, भरोसा र मियो बन्न सफल भइरहेका छन् । उनकै सिको गर्दै नागरिकस्तरबाटै समेत आफ्नो गच्छेअनुसार सामाजिक सेवा गर्ने अभियानले गति लिन थालेको छ । उनले सुरु गरेको अभियानलाई सम्भवतः तीन करोड नेपालीकै साथ मिलिरहेको छ, अपवादबाहेक ।
भलै यो एउटा सुरुवाती चरण छ, तर सीतारामले सुरु गरेको यो अभियानले हिजो बीपी, पुष्पलाल, मदन भण्डारी, राजा महेन्द्र र वीरेन्द्रले देखेको सपनाले मूर्तरुप धारणा गरेको छ । भलै उनी कुनै राजनीतिक सिद्धान्तबाट निर्दे्शित छैनन् । आज मुलुक र जनताले देखिने गरी सकारात्मक परिवर्तनको आभास गरिरहेका छन् ।
के सीताराम र कुञ्जनाले सुरु गरेको समाजसेवाको यो अभियानले राजनीति गर्नेहरुलाई छोएको छ रु यदि राजनीति गर्नेहरु साँच्चिकै इमानदार छन् र उनीहरु आफ्ना आदर्श नेतालाई विश्वास गर्छन् भने धुर्मुस सुन्तलीले सुरु गरेको यो अभियानमा हातेमालो गर्दै समग्र नेपालको विकास र जनतालाई समृद्ध बनाउने अभियानमा साथ दिन आवश्यक छ । किनभने हिजो जुन किसिमको सपना बीपी, पुष्पलाल, मदन भण्डारी, महेन्द्र र वीरेन्द्रले देखे, त्यही कुरालाई व्यवहारमा उतार्ने काम धुर्मुस सुन्तलीले गरिरहेका छन् ।
हिजो जुन किसिमको सपना बीपी, पुष्पलाल, मदन भण्डारी, महेन्द्र र वीरेन्द्रले देखे, त्यही कुरालाई व्यवहारमा उतार्ने काम धुर्मुस सुन्तलीले गरिरहेका छन् ।
यो एउटा व्यक्तिको मात्र नभएर समग्र नेपालीको चाहना हो । जसलाई निरन्तरता दिन सकेमात्र हिजो हाम्रा अग्रजले देखेको सपना पूरा हुनसक्छ । त्यसका लागि आवश्यकता छ त केवल तपाईं हाम्रो साथको । त्यसका लागि हामी सबै एकजुट बनौँ र धुर्मुस सुन्तलीको यो अभियानमा होस्टेमा हैंसे गरौं । सबै राजनीतिक दलहरुका बिकासवादी चिन्तनलाइ धुर्मुस सुन्तलीले कार्यान्वयन गरिरहेका छन् ।
