- २०८१ बैशाख ८ शनिबार
अमेरिकाको फेडेरल ट्रेड कमिसनले अहिले टिक टकको नामले चिनिने लोकप्रिय सामाजिक संजाल एप म्युजिकलीलाइ अवैध रुपमा बालबालिकाको सूचना संकलनको आरोप लगाउँदै ५७ लाख अमेरिकी डलर जरिवाना सजाय सुनाएको छ ।
फेडेरल ट्रेड कमिसनले जनाएअनुसार उक्त एपका धेरै प्रयोगकर्ताहरू १३ वर्ष भन्दा मुनिका बालबालिका रहेका छन् । त्यसैगरी कमिसनले सो एपले उनीहरूको नाम, इमेल ठेगाना, विद्यालय लगायतका विवरण सार्वजनीक गरेको र बालबालिकाका कतिपय व्यक्तिगत विवरण संकलन गर्दा उनीहरूको अभिभावकबाट कुनै अनुमति नलिएको आरोप लगाएको छ । यसका साथै एपमाथि केही अभिभावकले आफ्नो बच्चाको विवरण हटाउन माग गर्दा पनि नहटाएको आरोप लगाइएको छ ।
अमेरिकाको संघीय कानुनमा रहेको ‘चिल्ड्रेन अनलाइन प्राइभेसी प्रोटेक्सन एक्ट’ अनुसार कुनै पनि अनलाइन सेवाले १३ वर्षभन्दा मुनिका बालबालिकाको व्यक्तिगत सूचना संकलन गर्दा उनीहरूको अभिभावकबाट अनुमती लिनु पर्छ ।
त्यसैगरी फेडेरल ट्रेड कमिसनले कारवाही गर्ने घोषणा गरेसंगै टिक टकले भने १३ वर्षका बालबालिकाका लागि भनेर छुट्टै एपको घोषणा गरेको छ । कम्पनिले बताएअनुसार नयाँ एपले प्रयोगकर्ताका व्यक्तिगत विवरणहरू सार्वजनिक गर्ने छैन र बालबालिकाले एपमा के पोस्ट गर्ने र सेयर गर्ने भन्ने कुरामा पनि अंकुश लगाइने छ ।
चाइनिज कम्पनि बाइटडान्सले २०१७ मा म्युजिकली एपलाइ किनेर आफ्नो एप टिक टकमा मर्ज गरेको थियो ।
