- २०८१ बैशाख ८ शनिबार
मङ्गल ग्रहमा पाइला टेक्ने पहिलो अन्तरिक्ष यात्री महिला हुनसक्ने प्रबल सम्भावना रहेको नासाका प्रमुखले जनाएका छन् ।
नासाका प्रशासक जीम ब्राइडेस्टाइनले अमेरिकाको एक रेडियो कार्यक्रममा नासाको आगामी अन्तरिक्ष कार्यक्रमहरूमा महिला अन्तरिक्ष यात्री र वैज्ञानिकहरूलाई प्रमुख प्राथमिकतामा राखिने जानकारी दिएका थिए ।
त्यसैगरी उनले चन्द्रमामा पुग्ने अघिल्लो अन्तरिक्ष यात्री पनि महिला नै हुने सम्भावना रहेको बताएका छन् ।
नासाले यही महिनाको अन्त्यतिर पहिलोपटक महिला मात्र समावेश भएको अन्तरिक्ष यात्रीको टोलीद्वारा अन्तर्राष्ट्रिय स्पेस स्टेसन(आइएसएस)मा 'स्पेसवाक'को आयोजना गर्दै छ । नासाका अन्तरिक्ष यात्री एन म्याकक्लेन र क्रिस्टिना कोचले मार्च २९ गते करिब ७ घण्टा अन्तरिक्ष यान बाहिर 'स्पेसवाक' गर्नेछन् ।
'स्पेसवाक' भनेको अन्तरिक्षमा आफ्नो यानभन्दा बाहिर गएर कुनै कार्य गर्नु हो । अन्तरिक्ष यात्रीहरूले स्पेसवाकका रुपमा विभिन्न वैज्ञानिक प्रयोग गर्नुका साथै नयाँ उपकरणको परिक्षण गर्ने गर्दछन् । त्यसैगरी अन्तरिक्ष यान वा उपग्रहहरूमा समस्या आउँदा पनि ती यानलाइ पृथ्वीमा फिर्ता ल्याउनुको सट्टा अन्तरिक्ष मै मर्मत गर्नु परेमा स्पेसवाक गर्ने गरिन्छ ।
नासाका अनुसार अहिले उक्त संस्थामा झन्डै ३४ प्रतिशत महिला अन्तरिक्ष यात्री रहेका छन् ।
नासाले २०२० अगस्टतिर आफ्नो ‘मार्स २०२० मिसन’अन्तर्गत एउटा रोभर मङ्गल ग्रहका लागि प्रक्षेपण गर्ने जनाएको छ । जसमा रहेका सातवटा उपकरणहरूले मङ्गल ग्रहमा अहिलेसम्मकै सबैभन्दा महत्वकांक्षी वैज्ञानिक अनुसन्धान गर्ने नासाको योजना रहेको छ ।
यसअघि प्रक्षेपण गरिएका नासाका क्युरोसिटी, अपरच्युनिटी र स्पिरिट रोभरले हाँसिल गरेको उपलब्धिको सहयोगमा नासाका वैज्ञानिकहरूले मङ्गल ग्रहमा जीवनको सम्भावनाबारे थप अध्ययन अनुसन्धान गर्नेछन् ।
