- २०८१ बैशाख १२ बुधबार
काठमाडौँ । यू-१९ विश्वकप छनौट अन्तर्गत आज नेपाली युवा टिमले युएईको सामना गर्दै छ ।
टस हारेर पहिला ब्याटिंग गरेको नेपालले युएईलाई २४८ रनको लक्ष्य दिएको छ । नेपालले ५० ओभरमा अलआउट हुदै २४७ रन बनाएको हो । नेपालका लागि हरिबहादुर चौहान र भीम सार्कीले अर्धशतक प्रहार गरेका थिए ।
सार्कीले ५३ रन बनाएर आउट भए भने चौहानले अविजित ६७ रन बनाएका थिए । चौहानले ७४ बल खेल्दै ६७ रन बनाउदा ७ चौका प्रहार गरेका छन् ।
त्यस्तै रीत गौतमले ४४ रन बनाएर आउट भएका थिए । त्यसैगरी आसिफ सेखले २७, रोहित पौडेलले १८ रन र पवन सराफले १२ रन बनाएका थिए । नेपालका सन्दीप जोरा ४, कमल सिंह ऐरी २, कुशल मल्ल र रशिद खान १-१ रन बनाएर आउट भएका थिए ।
युएईका बलर रिषव मुखर्जीले सर्वाधिक ४ विकेट लिएका थिए भने मुह्मुद्धीन फराउद्धीनले ३ विकेट लिए ।
नेपालले प्रतियोगितामा आफ्नो शुक्रबार खेलेको पहिलो खेलमा सिंगापुरविरुद्ध २१७ रनको फराकिलो जित हासिल गरेको थियो ।
प्रतियोगिताको पहिलो खेलमा युएईले आयोजक मलेसियालाई ५ विकेटले पराजित गरेको छ । त्यस्तै कुवेतले ओमानलाई ८ विकेटले पराजित गरेको छ ।
आज प्रतियोगिताका तीन खेल भैरहेका छन् । आज नेपालले युएईसँग खेल्ने छ भने कुवेतले सिंगापुर विरुद्ध खेल्ने छ । त्यस्तै आयोजक मलेसियाले ओमानसँग खेल्ने छ ।
यस प्रतियोगिताको विजयी टिम सिधै एशियाबाट सन् २०२० को जनवरी फेब्रुअरीमा दक्षिण अफ्रीकामा हुने यू-१९ विश्वकप क्रिकेटमा छनौट हुने छ ।
प्रतियोगिता अन्तर्गत नेपालले अप्रिल १५ मा तेस्रो खेल आयोजक मलेसियासँग खेल्ने छ भने अप्रिल १६ मा चौथो खेल ओमानसँग खेल्ने छ । छनौट खेलको अन्तिम तथा पाँचौ खेल अप्रिल १८ मा कुवेतविरुद्ध खेल्ने छ ।
मलेसियामा हुने एशिया स्तरको यू-१९ विश्वकप छनौट खेलका लागि रोहितकुमार पौडेलको कप्तानीमा १४ सदस्यीय टिम खेलिरहेको छ ।
यस खेलमा रोहितकुमार पौडेल (कप्तान), मोहमद आसिफ शेख, पवन सराफ, सन्दीप जोरा, भिम सार्की, रित गौतम, कमल सिंह ऐरी, रसिद खान, सागर ढकाल, कुशल मल्ल र हरि बहादुर चौहान खेलेका छन् ।
त्यस्तै टिमको प्रमुख कोचमा बिनोद कुमार दास रहेका छन् भने बिक्रम न्यौपाने फिजियो तथा टिम म्यानेजर तथा एनालिष्ट रमन शिवाकोटी रहेका छन् ।
