- २०८१ बैशाख १३ बिहीबार
काठमाडौँ । भारतीय वायुसेनाको बेपत्ता एएन-३२ जहाजको केही टुक्रा फेला परेको छ ।
खोजीकार्यमा संलग्न भारतीय सेनाले अरुणाचल प्रदेशको लिपोबाट १६ किलोमिटर उत्तरमा विमानको भग्नवाशेष भेटिएको भारतीय समाचार एजेन्सी एएनआईले जनाएको छ ।
जहाज जुन ३ मा असमको जोरहाटबाट उडेको थियो । यस जहाजमा ८ चालक दलका सदस्यसहित १३ जना सवार थिए ।
यो जहाज भेटिएको स्थान सियाङ्ग जिल्लाको पयुममा रहेको छ । वायुसेनाले जहाजको भग्नवाशेष बेपत्ता एएन-३२ मालवहाक विमानकै हो भन्ने एकिन गर्न बाँकी रहेको जनाएको छ । करिब १२ हजार फुटको उचाईमा जहाजको भग्नवाशेष फेला परेको हो ।
विमानका भग्नावशेष भेटिएको ठाउ अरुणाचल प्रदेशको एएन-३२ उडान मार्गबाट करिब १५-२० मिटर उत्तर तिर रहेको भारतीय सेनालाई उदृत गर्दै एएनआईले जनाएको छ ।
खराब मौसमका बावजुद भारतीय वायुसेनाको मालवहाक विमान एएन-३२ को खोजी अभियान चलाइरहेको छ । गत बुधवार वायुसेनाले यस विमानको खोजीका लागि एसयु-३० जेट लडाकु विमान, सी १३० जे, एमआई १७ र एएलएच हेलिकप्टर लगाइएको छ ।
यस सम्बन्धी विस्तृत जानकारी केहि समयमा नै दिइने भारतीय सेनाले जानकारी दिएको छ ।
