दाङका १० पालिकाको बजेट ६ अर्ब ३७ करोड

घोराही । दाङका सबै स्थानीयतहले आर्थिक वर्ष २०७६-७७ को बजेट सार्वजनिक गरेका छन् । जिल्लाका १० वटै पालिकाले आज आयव्ययको अनुमान प्रस्तुत गरेका हुन् । 

घोराही र तुलसीपुर दुई उपमहानगरपालिकासहित लमही नगरपालिका, राप्ती, गढवा, राजपुर, वङ्गलाचुली, दङ्गिशरण, बबई र शान्तिनगर गाउँपालिकाले एकैपटक बजेट सार्वजनिक गरेका हुन् । घोराही उपमहानगरपालिकाले रु एक अर्ब ७८ करोडको बजेट ल्याएको छ भने वडालाई चालू आर्थिक वर्ष जस्तै एक करोड बजेट विनियोजन गरेको छ । 

तुलसीपुर उपमहानगरपालिकाले रु एक अर्ब ७१ करोड बजेट ल्याएको छ भने प्रत्येक वडालाई तीन किलोमिटर पक्की बाटोसहित रु ६३ लाख बजेट विनियोजन गरेको छ । लमही नगरपालिकाले रु ६६ करोड बराबरको बजेट प्रस्तुत गरेको नगरप्रमुख कुलबहादुर केसीले जानकारी दिए । 

गाउँपालिकामध्ये सबैभन्दा बढी राप्ती गाउँपालिकाले रु ६० करोड बराबरको बजेट ल्याएको छ । पालिकाको प्रत्येक वडालाई रु ५४ लाखका दरले वडागत बजेट विनियोजन गरिएको गाउँपालिकाका प्रशासकीय अधिकृत जगत भुसालले जानकारी दिए । 
वङ्गलाचुली गाउँपालिकाले रु ४७ करोड ७० लाखको बजेट ल्याएको छ । यस पालिकाले प्रत्येक वडालाई रु ५० लाख बजेट छुट्याएको प्रशासकीय अधिकृत नेवबहादुर वलीले जानकारी दिनुभयो । त्यस्तै बबई गाउँपालिकाले रु ३४ करोड बराबरको बजेट ल्याएको उपाध्यक्ष सावित्रा विकले जानकारी दिईन । उनका अनुसार वडालाई पालिकाले करीब रु ७० लाख बजेट छुट्टाएको छ ।

मानव विकासको सूचकाङ्कमा सबैभन्दा पछाडि परेको राजापुर गाउँपालिकाले सबैभन्दा कम रु २६ करोडको बजेट सार्वजनिक गरेको गाउँपालिका अध्यक्ष लोकराज केसीले जानकारी दिए । राजापुरले वडाको अवस्था, भौगोलिक विकटता, जनसङ्ख्याको आधारमा रु ६८ देखि रु ७४ लाखसम्म वडाका लागि बजेट विनियोजन गरेको छ ।

जिल्लाको पूर्व दक्षिणतर्फ पर्ने गडवा गाउँपालिको भने रु ४५ करोड बराबरको बजेट ल्याएको गाउँपालिका अध्यक्ष शान्ति चौधरीले जानकारी दिईन । गढवाले पनि वडाको अवस्था हेरेर रु ६१ देखि रु ८० लाखसम्म वडागत बजेट विनियोजन गरेको छ । गाउँपालिकाले विशेषगरी पूर्वाधार र शिक्षा, स्वास्थ्यमा धेरै बजेट छुट्याएको पनि उनले जानकारी दिईन । जिल्लाको पश्चिम क्षेत्रमा पर्ने शान्तिनगर गाउँपालिकाले करीब ३४ करोड बराबरको बजेट ल्याएको छ भने दङ्गिशरण गाउँपालिकाले रु ३६ करोड बराबरको बजेट प्रस्तुत गरेको छ ।
 
लमहीको बजेट रु ६५ करोड 

लमही नगरपालिकाले आगामी आर्थिक वर्षका लागि रु ६५ करोड १४ लाख ९८ हजारको बजेट प्रस्तुत गरेको छ । पाँचौँ नगरसभामा आव २०७६÷७७ को बजेट प्रस्तुत गर्दै उपप्रमुख देवाका बेल्वासेले आन्तरिक स्रोत तर्फ रु १५ करोड, सङ्घीय तथा प्रदेश सरकार समानीकरण स्रोत अनुदानतर्फ रु १५ करोड ११ लाख ३८ हजार र राजश्व वाँडफाँटतर्फ रु १३ करोड ३४ लाख ६० हजार र सशर्त अनुदानतर्फ रु १८ करोड १९ लाख प्राप्त हुने अनुमान गरिएको बजेट सार्वजनिक गरिन ।

बजेटमा चालू खर्च रु १३ करोड ५५ लाख ९८ हजार र पूँजीगततर्फ रु ५१ करोड ५९ लाख अनुमान गरिएको छ । विषयगत शाखाअन्तर्गत आर्थिक विकास शाखामा रु दुई करोड ५० लाख, सामाजिक विकास क्षेत्रमा रु चार करोड, पूर्वाधार विकास क्षेत्रमा सबैभन्दा बढी रु १५ करोड ९० लाख, वातावरता तथा विपद् व्यवस्थापनमा रु एक करोड ५० लाख, सुशासन तथा संस्थागत विकासमा रु ५० लाख, वडा पालिकालाई रु ९ करोड बजेट प्रस्तावित गरिएको छ । नगरसभामा एक मुष्टरुपमा मात्रै बजेट प्रस्तुत गरिएको छ । 

लमही नगरपालिकाले गुणस्तरीय शिक्षाको आधारशिला निर्माण, नागरिकको आधारभूत स्वास्थ्यको प्रत्याभूति, कृषि सेवा कार्यक्रम, पूर्वाधार विकास, विपद् व्यवस्थापन, वन तथा वातावरण संरक्षण, खेलकूद तथा युवा स्वरोजगारलगायतका कार्यक्रमलाई नगरको दिगो विकास क्षेत्र, नीति र प्राथमिकताको रुपमा उल्लेख गरेको छ ।