- २०८१ बैशाख १२ बुधबार
काठमाडौँ । विश्वकप क्रिकेट अन्तर्गत मंगलबार भएको पहिलो सेमिफाइनल खेल बर्षाले रोकिएपछि आज हुने भएको छ ।
भारत र न्युजील्याण्डबीचको सेमिफाइनल खेल वर्षाले अवरुद्ध भएपछि पहिलो दिन हुन नसकेको खेललाई ‘रिजर्भ डे’ मा पुरा गर्न लागिएको हो ।
आइसीसीको नियम अनुसार मंगलबार खेल रोकिएकै अवस्थाबाट आज खेल सुचारु हुने छ । आज नेपाली समय अनुसार सवा ३ बजे सुरुमा न्युजील्याण्डले खेल्न बाँकी रहेको ३.१ ओभर ब्याटिंग गर्ने छ भने त्यस पछि भारतले जवाफी ब्याटिंग गर्ने छ ।
न्युजील्याण्डका रोज टेलर र टम लाथम नट आउट रहदै क्रीजमा छन् भने भारतीय त्रिवगतिका बलर जसप्रित बुमराहले २ ओभर तथा भुवनेश्वर कुमारको १.५ ओभर बाँकी रहेको छ ।
मंगलबार टस जितेर पहिला ब्याटिंग गरेको न्युजील्याण्डले ४६.१ ओभरमा ५ विकेट गुमाउदै २११ रन बनाउदा बर्षा शुरु भएपछि खेल अवरुद्ध भएको थियो ।
अत्यन्त सुस्त सुरु गरेको न्युजील्याण्डले १० ओभरको पावरप्लेमा एक विकेट गुमाएर केबल २७ रन मात्र बनाएको थियो । १७औ बलमा पहिलो रन जोडेको न्युजील्याण्डलाई कप्तान केन विलियम्सन र हेनरी निकोलस ले सम्हालेका थिए । दुवैले दोस्रो विकेटका लागि ६८ रनको साझेदारी गरेका थिए । न्युजील्याण्डका लागि दोस्रो ठुलो साझेदारी रोज टेलर र विलियम्सनबीच ६५ रनको भएको थियो ।
न्युजील्याण्डका लागि रोज टेलर ६७ रन बनाएर खेलिरहेका छन् भने उनलाई टम लिथामले ३ रन बनाएर साथ दिइरहेका छन् ।
यस अघि कप्तान केन विलियम्सनले ६७ रन बनाएर आउट भएका थिए । त्यस्तै हेनरी निकोलस २८ रन बनाएर आउट भएका थिए । त्यस्तै जिम्मी निशामले १२ रन बनाए भने कोलिन डि ग्राण्डहोम १६ रन बनाएर आउट भए । यस अघि ओपनर मार्टीन गप्टिल एक रनमा आउट भएका थिए ।
त्यस्तै भारतीय बलरले किफायती बलिङ गरेका छन् । भारतका लागि भुवनेश्वर कुमार, जसप्रित बुमराह, हार्दिक पाण्डेय, रविन्द्र जडेजा र युजवेन्द्र चहलले एक एक विकेट लिएका थिए ।
सेमिफाइनल खेल बर्षाले रोकिएमा दोस्रो दिन रिजर्भ दिनको रुपमा खेललाई फेरी सुरु गर्न सकिने नियम आइसीसीले बनाएको छ । रिजर्भ दिनमा पनि खेल हुन नसकेमा सेमिफाइनलको हकमा लिग चरणमा अगाडी रहेको टिम फाइनलमा पुग्ने छ । फाइनल खेल पनि वर्षाले अवरुद्ध भएर खेल हुन नसकेमा दुवै टिमलाई ट्रफी बाडिने नियम रहेको छ ।
त्यस्तै सेमिफाइनल र फाइनल खेल बराबर भएमा भने सुपर ओभरमा खेलको निर्णय हुने छ ।
अहिलेको अवस्थामा न्युजील्याण्डले थप ब्याटिंग नगरेमा र भारतको खेल्ने अवस्था भएमा डक वर्थ लुइस नियम अनुसार भारतले २० ओभरमा १४८ रनको लक्ष्य पाउने छ भने ४६ ओभरको खेल भएमा २३७ रनको लक्ष्य पाउने छ ।
