- २०८१ बैशाख ८ शनिबार
बारा । डिभिजन वन कार्यालय बारा, सिमराले ४० हेक्टर अतिक्रमित बनलाई पुनः वन क्षेत्र मैं कायम गर्न सफल भएको छ ।
मुलुकमा राजनैतिक अस्थितरता भएको बेलामा भएका वन अतिक्रमित क्षेत्रको अध्ययन अवलोकन गरी सरकारको निति अनुरुप अभियान अगाडी बढाए पछि यो सफलता मिलेको हो ।
यस आर्थिक वर्ष २०७५-०७६ मा जिल्लाका बिभिन्न स्थानमा करिव ४० हेक्टर बनको अतिक्रमण हटाई वन क्षेत्र कायम गर्न डिभिजन वन कार्यालय बारा, सिमरा सफल भएको छ ।
जीतपुरसिमरा उपमहानगरपालिका २२ चकरीमा ७.५ कोल्हवी नगरपालिकाको मधुवनमा ५ र बोधवनमा २७ हेक्टर वन क्षेत्रको अतिक्रमण हटाई कार्यालयले कतिपय स्थानमा बृक्षा रोपण समेत गरिसकेको छ ।
अतिक्रमणकारीहरुलाई हटाउँन डिभिजन कार्यालय सिमराले नयाँ रणनितिका साथ अगाडी बढेको छ । पहिला जस्तो प्रहरी प्रशासनको बल प्रयोग नगरी समुदायका अगुवा , स्थानीय तहका निर्वाचित पदाधिकारी र विभिन्न सरोकारवालाको समुहसँग अन्तरक्रिया गर्दै वन , डिभिजन वन कार्यालयको मात्र नभै हामी र हाम्रो समुदायको लागि हो , भन्ने बुझाउँदै अतिक्रमण फिर्ता गराईएको हो ।
वन अतिक्रमण हटाईउँन सिंङ्गो डिभिजन वन कार्यालय मात्र नभै सबै जनाको साथ र सहयोगले यो सम्भव भएको डिभिजन वन कार्यालय बारा सिमराका प्रमुख मन्जुर अहमतले बताए । उनले यो अभियानलाई निरन्तरता दिईने समेत बताए ।
अतिक्रमित जमिनमा बृक्षा रोपण गर्न देखि विरुवाको रेख देख र संरक्षण गर्न तिनै समुदायलाई जिम्मा लगाईएको छ । अतिक्रमित बनलाई पुनः वन क्षेत्रमा कायमगरी बिधि र प्रकृया मिलाएर समुदायलाई नैं हस्तारण भएकोमा स्थानीय ससस्वती घले र राम बहादुर स्यांगतानले खुसी व्याक्त गरेका छन् ।
कुल ४५ हजार हेक्टर भू–भाग ओगटेको बाराको जंगल अहिले खुम्चिएर ३१ हजार हेक्टरमा सिमित भएको कार्यालयको तथ्यांकले देखाउँछ । कतिपय बाराको जंगल राष्ट्रिय गौरवका आयोजना फास्टट्रयाक , दोश्रो अन्तराष्ट्रिय विमानस्थलले समेत ओगटेको छ । पछिल्लो पाँच वर्ष यता बारामा संस्थागत र अन्य गरी ११.६४ हेक्टर जंगल अतिक्रमणको चपेटामा परेको तथ्यांकले देखाउँछ ।
यति हुँदा हुँदै पनि समग्र मुलुकको जंगलको अवस्था भने ३९.७ प्रतिशतबाट बढेर ४४.६ प्रतिशत भएको तथ्यांकमा उल्लेख छ ।
