- २०८१ बैशाख ८ शनिबार
मुम्बई । बलिवुडमा सार्वजनिक बिदाको दिन अगष्ट १५ मा रिलिज भएको अक्षयकुमार को फिल्म मिशन मंगलले पहिलो दिन रेकर्ड कलेक्सन गरेको छ ।
मिशन मंगलले रिलिजको पहिलो दिन २९ करोड १६ लाख कलेक्सन गर्दै अक्षयकुमारको क्यारियरकै पहिलो दिन धेरै कलेक्सन गर्ने फिल्म बनेको छ । यो फिल्म भारतमा ३ हजार स्क्रिनमा रिलिज भएको छ ।
अक्षयको यस अघि रिलिज फिल्म २१०८ मा गोल्डले २५ करोड २५ लाख कलेक्सन गरेको थियो भने २०१६ मा रिलिज भएको रुस्तमले १४ करोड ११ लाख र २०१७ मा रिलिज भएको टवाइलेट एक प्रेम कथाले पहिलो दिन १३ करोड १० लाख कलेक्सन गरेको थियो ।
मिशन मंगल विज्ञान विषयमा बनेको पहिलो फिल्म मानिएको छ । फिल्मलाई विश्लेषकहरुले राम्रो समिक्षा दिएका छन् ।
यस फिल्ममा अक्षयका अलावा विद्या बालन, सोनक्षी सिन्हा, तापसी पन्नु, कीर्ति कुल्हारी, नित्या मेनन, शरवन जोशी लगायतले अभिनय गरेका छन् ।
बलिवुडमा १५ अगस्टमा रिलिज भएर अहिलेसम्म धेरै कलेक्सनको रेकर्ड अजय देवगनको फिल्म संघम रिटर्नसको रहेको छ । संघम रिटर्नसले पहिलो दिन ३२ करोड कलेक्सन गरेको थियो । त्यस्तै १५ अगस्टमै रिलिज भएको सलमान खानको फिल्म एक था टाइगरले ३१ करोड कलेक्सन गरेको थियो ।
अक्षयको यस फिल्मले सलमान र अजयको यो रेकर्ड तोड्ने विस्वास गरिएको भएपनि मिशन मंगल सो रेकर्ड तोड्न भने असफल भएको छ ।
फिल्मलाई जगन शक्तिले निर्देशन गरेका हुन् भने फिल्मलाई होप प्रोडक्सन, फक्स स्टार स्टुडियो र केप अफ गुड फिल्म्सले निर्माण गरेका हुन् ।
त्यस्तै १५ अगस्टमै रिलिज भएको जोन अब्राहीमको फिल्म बाटला हाउसले पहिलो दिन १४ करोड ५९ लाख कलेक्सन गरेको छ ।
