अठार वर्षपछि उपभोक्ता समितिको साधारणसभा, व्यापक अनियमिताको आशंका

खरीबोट

भक्तपुर । सूर्यविनायक नगरपालिका–१ सिरुटारमा सञ्चालित सिरुटार खानेपानी उपभोक्ता समितिलाई एक महीनाभित्र साधारणसभा सम्पन्न गर्न सांसददेखि नगरपालिकासमेतले निर्देशन दिएको छ ।

विसं २०५२ मा स्थापना भई हाल एक हजार २०० घरपरिवारलाई पानी वितरण गर्दै आएको समितिले १८ वर्षसम्म साधारणसभा नगरेको, लेखापरीक्षण  नगरेको, आयव्यय सार्वजनिक नगरेको र समितिका कर्मचारीले व्यापक अनियमितता गरेको आरोप लाग्दै आएपछि वडा कार्यालयमा आज भएको सर्वपक्षीय बैठकले एक महीनाभित्र साधारणसभा गर्न निर्देशन दिएको हो । 

सूर्यविनायक–१ सिरुटार वडा कार्यालयले आज आह्वान गरेको उपभोक्ता भेलामा सहभागी स्थानीय बासिन्दा एवं प्रदेश नं ३ का प्रदेश सांसद शशीजङ्ग थापा, वडाध्यक्ष सानुकाजी कायस्थ, समितिका पदाधिकारी, जनप्रतिनिधि एवं उपभोक्ता सहभागी भेलाले आगामी असोज १० गतेभित्र समितिलाई साधारणसभा गर्न अन्तिम समय दिएको हो ।

असोज १० गतेभित्र साधारणसभा नगरे वडा कार्यालयले उक्त समिति विघटन गरी नयाँ समिति गठन गरेर अनियमितताबारे छानबिन गर्ने सर्तमा सबै सहमत भएका छन् । खानेपानी समितिमा रहेका पदाधिकारीमध्ये कोषाध्यक्षसहित दुई सदस्यको मृत्यु भइसकेको र हाल अध्यक्ष, सचिव र सदस्यसहित चार जना मात्रै रहँदा समितिभन्दा कर्मचारी हाबी हुँदा अनियमितता भएको र कर्मचारीले रु १० हजारमा जडान गर्नुपर्ने धारालाई ४० हजारसम्म लिएर जडान गर्ने गरेको भन्दै छलफलमा समितिको व्यापक आलोचना भएको थियो ।

भेलामा सांसद थापाले काकाकुल रहेको सिरुटारमा आफू गाविस अध्यक्ष हुँदादेखि खानेपानी ल्याउन पहल भएको बताउँदै आएको खानेपानी पनि अव्यवस्थित हुँदा कतै वर्र्षौंदेखि पानी नगएको र कतै जथाभावी छाडिएको पाएको बताए ।  खानेपानीका कर्मचारीबाट व्यापक अनियमितता भएको, एउटै धारा जडान गर्न कर्मचारीले रु एक लाखसम्म मागेको गुनासो आफूमा आएको बताउँदै भेलाको निर्णयानुसार असोज १० गतेभित्र साधारणसभा गर्न समितिलाई निर्देशन दिए । 

वडा नं १ का वडाध्यक्ष सानुकाजी कायस्थले असोज १० गतेभित्र समितिले साधारणसभा नगरे असोज ११ गते नगरपालिकाले हस्तक्षेप गर्ने र समिति सञ्चालन गरेर अनियमितताबारे छानबिन गरिने निर्णय भएको बताए । समितिका अध्यक्ष अच्युत मिश्रले आफूले निकै दुःख गरेर खानेपानीको व्यवस्था गरेको बताउँदै केही कर्मचारीको बेइमानीले समस्या आएको बताए । उनले समितिको अडिट भइरहेको बताउँदै भेलाले गरेको निर्णयानुसार असोज १० गते अगाडि नै साधारणसभा गरेर नयाँ समिति गठन गर्ने बताए ।  

यसअघि पनि समितिले एक वर्ष अघि डिभिजन खानेपानी कार्यालयमा भेला गरी जनप्रतिनिधिको रोहबरमा ४५ दिनभित्र साधारणसभा गर्ने भनिए पनि हुन सकेन । साधारणसभा नहुँदा सरकारी तथा गैरसरकारी संस्थाले बजेट नदिँदा थप खानेपानीको व्यवस्था गर्न र पानी शुद्धीकरणसमेत गर्न सकिएको छैन । यसक्षेत्रमा चार वर्षदेखि सिरुटार उपयोगी चोक क्षेत्रमा पानी आएको छैन भने केही स्थानमा सातामा केही दिन र केही स्थानमा तरकारीमा लगाउनसमेत पुग्ने गरी पानी वितरण गर्दै आएको स्थानीवासीको भनाइ छ । 

सम्बन्धित समाचार

भक्तपुरका कला–संस्कृति विस्थापित हुने खतरा

भक्तपुर । नेपाल मजदुर किसान पार्टीका अध्यक्ष नारायणमान बिजुक्छेले कलाको राज्य भक्तपुरको मूर्त–अमूर्त कला–संस्कृतिलाई नयाँ पुस्तामा हस्तान्तरण गर्नुपर्ने बताएका छन् । आज नेपाल क्रान्तिकारी डकर्मी सङ्घको तेस्रो भक्तपुर जिल्ला सम्मेलनको

भक्तपुरमा डेंगुको उच्च जोखिम

भक्तपुर । देशभरि फैलिएको डेङ्गु रोग भक्तपुरमा महामारीका रुपमा फैलिँदै गएको छ । एक साताको अवधिमा जिल्लामा ९९ जना बिरामीमा डेङ्गु रोग भएको पुष्टि भएको छ । जिल्ला जनस्वास्थ्य कार्यालय भक्तपुरका

भक्तपुरमा समेत १२ जनामा डेङ्गु 

भक्तपुर । देशभरि फैलँदै गएको डेङ्गुको असरले भक्तपुर जिल्लालाई पनि  उच्च जोखिममा पारेको छ ।  जिल्ला स्वास्थ्य कार्यालयका स्वास्थ्य अधिकृत पार्थमणि न्यौपानेले गत वर्षभन्दा यस वर्ष चार दोब्बर डेङ्गुको बिरामी भेटिएकाले

वैकल्पिक सडक नहुँदा बालकोट–सिरुटारका बासिन्दालाई सास्ती

भक्तपुर । सूर्यविनायक नगरपालिका– २ स्थित बालकोट–सिरुटार सडक विस्तार, ढल व्यवस्थापन एवं कालोपत्र गर्ने काम शुरु भएको छ । मध्यपुरथिमिको कौशल्टारबाट बालकोट, सिरुटार हँुदै बिरुवा जाने एकमात्र मूल सडकको रुपमा


z