- २०८१ बैशाख ८ शनिबार
बुटवल । राप्रपा निकट राष्ट्रिय प्रजातान्त्रिक युवा संगठनले राष्ट्रियता संरक्षण तथा भ्रष्टाचार विरुद्ध मेची महाकाली युवा अभियान संचालन गर्ने निर्णय गरेको छ ।
रुपन्देही जिल्लाको बुटवल स्थित विश्व हिन्दु महासंघको सभामा भाद्र २० र २१ गते भएको परिषद बैठकले देशलाई भ्रष्टाचार मुक्त बनाउने अभियान संचालन गर्ने भएको हो ।
परिषद बैठकले संगठनलाई देशकै एक मात्र राष्ट्रवादी युवा संगठन भएको ठहर गर्दै राष्ट्रियता संरक्षण अभियान संचालन गर्ने निर्णय गरेको छ ।
संगठनले देशका सबै विधालयमा अनिवार्य संस्कृत शिक्षा र नैतिक शिक्षा पठनपाठन गर्न माग गर्ने भएको छ । त्यस्तै परिषद बैठकले वेरोजगार युवाका लागि रोजगारको नीति र वेरोगारी भत्ता समेत प्रदान गर्न सरकारसँग माग गर्ने भएको छ ।
परिषद बैठकले आगामी फागुन १६,१७ र १८ गते संगठनको केन्द्रिय महाधिवेशन गर्ने निर्णय समेत गरेको छ ।
त्यसैगरी बैठकले प्रदेश नं. १,२ र ७ मा युवा भेला तथा प्रशिक्षण कार्यक्रम गर्ने निर्णय समेत गरेको छ । साथै संगठनले नाम र झण्डा परिवर्तन गर्ने सम्बन्धमा उपाध्यक्ष दामोदर वाग्लेको संयोजकत्वमा अध्ययन समिति निर्माण गरेको छ ।
त्यस्तै राप्रपा युवा संगठनले अध्यक्ष प्रकाश रिमालको राजनीति प्रतिवेदन, महासचिव विनोद भारतीको सांगठनिक प्रतिवेदन, कोषाध्यक्ष गुणराज राजभण्डारीको आर्थिक प्रतिवेदन तथा प्रवक्ता सुजित के.सीको युवा नीति तथा कार्यक्रम सम्बन्धि प्रतिवेदन पारित गरेको संगठनका उपाध्यक्ष ऋषिराज देबकोटाले जानकारी दिए ।
