रुपन्देही । सिद्धबाबा राजमार्गअन्तर्गत पाल्पा–बुटवल सडकखण्डको सिद्धबाबा नजिकै पहिरो खसेर चालकको मृत्यु भएको छ ।
आज बिहान १०:३० बजे बुटवलबाट पाल्पातर्फ आउँदै गरेको लु१ज २६१७ नंको जिपलाई माथिबाट खसेको पहिरोले पुर्दा गुल्मी छापचौर बस्ने चालक कमल सुनारको घटनास्थलमै मृत्यु भएको छ ।
यसैगरी पाल्पाबाट बुटवलतर्फ जाँदै गरेको लु२च ५९३८ नम्बरको स्कारपियो पनि पहिरोले पुरिएको र ६ जना घाइते भएको जिल्ला प्रही कार्यालय पाल्पाले जनाएको छ । घाइतेलाई बुटवलको लुम्बिनी प्रादेशिक अस्पतालमा उपचार भएको छ ।
सिद्धबाबा ड्याम साइड हेड बक्स नजिकै दुर्घटना भएको हो। एक महिना अघिमात्र सोही सडकमा पहिरो जाँदा एकजना मोटरसाइकल चालकको मृत्यु भएको थियो ।
रातभरी परेको पानीको कारण ढुङ्गासहितको पहिरो खसेपछि अवरुद्ध बनेको सिद्धार्थ राजमार्ग अहिले एकतर्फी सञ्चालन भइरहेको छ ।