राष्ट्रपति भण्डारी आज म्यान्मारको राजकीय भ्रमणमा जादै 

खरीबोट

काठमाडौँ । राष्ट्रपति विद्यादेवी भण्डारी आजदेखि कात्तिक ३ गतेसम्म म्यान्मार गणतन्त्र सङ्घका राष्ट्रपति ऊ विन मिन्तको मैत्रीपूर्ण निमन्त्रणामा राजकीय भ्रमणमा जादै छन् ।

भ्रमणका अवसरमा राष्ट्रपति भण्डारीले आफ्ना समकक्षी मिन्तसँग द्विपक्षीय वार्ता गर्ने परराष्ट्र मन्त्रालयले जनाएको छ ।

राष्ट्रपति भण्डारीसँग म्यान्मारका स्टेट काउन्सिलर आङ साङ सुकीले भेट गर्ने कार्यक्रम रहेको छ । राष्ट्रपति भण्डारी र उनको प्रतिनिधिमण्डलको सम्मानमा म्यान्माली राष्ट्रपति मिन्तले राजकीय भोजको आयोजना गर्ने छन् । 

म्यान्मारमा रहँदा राष्ट्रपति भण्डारीले नेपाली मूलका नागरिकसँग पिन ओ लिनमा भेटघाट गर्नाका साथै युनेस्कोको विश्व सम्पदा बगान र यङ्गोनको भ्रमण गर्ने परराष्ट्र मन्त्रालयले जनाएको छ । यङ्गोनमा उनले ऐतिहासिक एवं सांस्कृतिक महत्वका स्थानको भ्रमण गर्ने कार्यक्रम रहेको छ ।

राष्ट्रपति भण्डारीको प्रतिनिधिमण्डलमा परराष्ट्रमन्त्री प्रदीपकुमार ज्ञवाली, परराष्ट्र मन्त्रालय र  राष्ट्रपति कार्यालयका सचिव, राष्ट्रपति कार्यालय र परराष्ट्र मन्त्रालयका उच्चपदस्थ अधिकारी तथा सञ्चारकर्मी रहने मन्त्रालयबाट सोमबार जारी प्रेस विज्ञप्तिमा जनाइएको छ । राष्ट्रपतिको प्रतिनिधिमण्डल बुधबार बिहान नेपाल एयरलायन्सबाट बैंकक हुँदै म्यान्माको राजधानी नेपित पुग्नेछ ।  

दक्षिण एशियाको नेपाल र दक्षिणपूर्वी एशियामा पर्ने म्यान्मा र दुवै बहुपक्षीय प्राविधिक तथा आर्थिक सहयोगका लागि बङ्गालको खाडीको प्रयास(बिम्स्टेक)का सदस्य हुन् । नेपालसँग म्यान्माको सम्बन्ध १५० वर्ष पुरानो छ ।

बौद्धधर्मले दुवै देशलाई अझै निकट बनाएको छ । दुई देशबीच सन् १९६० मार्च १९ (विसं २०१६ चैत ६) राजदूतस्तरमा कूटनीतिक सम्बन्ध स्थापना भएको हो । तत्कालीन राजा महेन्द्रले विसं २०२६ तथा राजा वीरेन्द्रले २०३६ र प्रधानमन्त्री कीर्तिनिधि विष्ट तथा तत्कालीन प्रधानमन्त्री सुशील कोइरालाले विसं २०७० फागुन २० (सन् २०१४ मार्च ४) मा भएको  बिम्स्टेक सम्मेलनका बेला ‘स्वर्णभूमि’मा प्रधानमन्त्रीस्तरमा भ्रमण भएदेखि नेपालबाट उच्चस्तरको भ्रमण भएको छैन । सन् १९८९ अघि बर्मा नाम रहेको म्यान्माको राजधानी सन् २००६ देखि यङ्गोनबाट नेपित सारिएको छ । 

तत्कालीन राष्ट्रपति ने वीनले सन् १९६६(२०२३ तिर ) र १९७७ ( २०३४ तिर ) तथा प्रधानमन्त्री ऊ सेन विङले सन् १९७५ (विसं २०३२ तिर) मा नेपाल भ्रमण गरेका थिए ।  प्रजातन्त्रवादी नेत्री तथा धम्मावती गुरुमाकी चेली आङ साङ सुकीले बेलाबेला नेपाल भ्रमण गरेकी छन् । द्ई देशबीच राजनीतिक, कूटनीतिक, सांस्कृतिक तहबाट भ्रमणको आदानप्रदान भइरहेको छ । सन् २०१६/१७ मा करीब २५ हजार म्यान्मालीले नेपाल भ्रमण गरेका थिए ।

अठासी प्रतिशत बौद्ध धर्मावलम्बी भएको म्यान्माले लुम्बिनीमा एक पेगोडा र गुम्बा निर्माण गरेको छ । नेपालले प्रदान गरेको गौतमबुद्धको जीवनी झल्कने काठका १६ तख्ता याङ्गुन(रङ्गुन)स्थित श्वे दागोन गुम्बामा राखिएको छ । 

गौतम बुद्धले आफूले बुद्धत्व प्राप्त गरेपछि केही भिक्षुहरुलाई आफ्नो केश दिएको र त्यसैबाट त्यहाँ चैत्य निर्माण भएको बताइन्छ ।

नेपाल उद्योग वाणिज्य महासङ्घ र युनियन अफ म्यान्मा उद्योग वाणिज्य महासङ्घबीच समझदारी भए पनि त्यति सन्तोषजनक भने छैन । सन् २०१२ अक्टोबर( विसं २०६९ असोजतिर) देखि नेपालका लागि प्रवेशाज्ञा आवेदन दिने म्यान्मालीको सङ्ख्या बढेको यङ्गोनस्थित नेपाली राजदूतावासले जनाएको छ  ।  

विभिन्न पेशाव्यवसाय गरी  बसेका नेपाल मूलका बर्मेली म्यान्मामा करीब दुई  लाख छन् जो नेपाली संस्कृति मान्छन् । विसं २०५४ मा म्यान्मारका ठाकुरप्रसाद गुरागाईँले नेपालको प्रतिष्ठित जगदम्बा पुरस्कार प्राप्त गरेका छन् । नेपालीहरु कृषि, व्यापार व्यवसायमा संलग्न छन् ।

म्यान्माका मन्दिरहरुमा खोलिएका पाठशालामा नेपाली भाषा, साहित्य, धर्म र संस्कृतिबारे अध्ययनअध्यापन हुन्छ । नेपाल म्यान्माबीच जनस्तरमा राम्रो सम्बन्ध  छ । सयभन्दा बढी जातीय समूह रहेको म्यान्माका धार्मिक पर्यटक नेपाल आकर्षण गर्न सकिन्छ ।  

सम्बन्धित समाचार

द्वन्द्वको घाउ निको हुन समय लाग्छ : राष्ट्रपति भण्डारी 

काठमाडौँ । राष्ट्रपति विद्यादेवी भण्डारील द्वन्द्वको घाउ निको हुन केही समय लाग्ने बताएकी छन् ।  राष्ट्रपति भवन, शीतल निवासमा आज आयोजित समारोहमा राष्ट्रिय मानवअधिकार आयोगको आर्थिक वर्ष २०७५-७६ को वार्षिक

अपाङ्गता भएकालाई मूलप्रवाहमा ल्याइनुपर्छ : राष्ट्रपति भण्डारी

काठमाडौँ । राष्ट्रपति विद्यादेवी भण्डारीले फरक क्षमता भएका व्यक्तिलाई विकासको मूलप्रवाहमा समावेश गरी आत्मनिर्भर बनाउनु राज्यको गहन दायित्व भएको बताएकी छन् । अपाङ्गता भएका व्यक्तिहरुको २८औँ अन्तर्राष्ट्रिय दिवसका अवसरमा आज एक

राष्ट्रपति भण्डारीद्वारा १३औं सागको समुद्घाटन

काठमाडौ । दक्षिण एशियाली खेलकुदको महाकुम्भ साग शुरु भएको छ । राष्ट्रपति विद्यादेवी भण्डारीले दशरथ रङ्गशालामा विशेष कार्यक्रमका बीच सागको औपचारिक उद्घाटन गरेकी छिन् । उद्घाटनमा राष्ट्रपति विद्यादेवी भण्डारीलगायत उपराष्ट्रपति नन्दबहादुर

राष्ट्रपति भण्डारीद्वारा रामको जन्तीलाई स्वागत

जनकपुरधाम । राष्ट्रपति विद्यादेवी भण्डारीले सीताराम विवाह महोत्सवअन्तर्गत भारतको अयोध्याबाट आएको प्रतीकात्मक भगवान् रामको जन्तीलाई शुक्रबार जनकपुरधाममा स्वागत र सम्मान गरेकी छन् ।  सीताराम विवाह महोत्सव–२०७६ मूल समारोह समितिद्वारा जनकपुरधामको बाह्रबिघा


z