- २०८१ बैशाख ४ मंगलबार
नयाँ दिल्ली । भारतको दिल्ली प्रदेशमा रहेका कूल बेडमध्ये अहिले १५ प्रतिशत मात्रै बेडमा विरामी भर्ना भएका छन् ।
अरु ८५ प्रतिशत बेड खाली नै रहेकाले बेडको अभाव हुन्छ की भनेर चिन्ता लिनु पर्ने अवस्था नरहेको अधिकारीले जनाएका छन् ।
दिल्ली प्रदेशका स्वास्थ्य मन्त्री सत्यन्द्र जैनले प्रदेशभरीमा औसतमा २५ हजार नयाँ सङ्क्रमित थपिने गरेको शुक्रबार जानकारी दिए ।
उनले अघिल्लो दिन दिल्लीमा २८ हजार ८६७ जना नयाँ सङ्क्रमित थपिएको विवरण सार्वजनिक गरे । सोही अवधिमा ३१ जनाको कोरोनाभाइरसका कारण निधन भएको पनि उनले बताए ।
त्यसैगरी २८ हजार सङ्क्रमित थपिएको बेला दुई हजार ४२४ जना सङ्क्रमित मात्रै अस्पताल भर्ना भएका थिए । दिल्लीका १३ हजारभन्दा बढी बेड खाली रहेको मन्त्री जैनले जानकारी दिए ।
उनका अनुसार कोरोनाका कारण मृत्यु भएकामध्ये ७५ प्रतिशतले खोप नलगाएको पाइएको छ । खोप लगाएकाहरूको मृत्युदर अत्यन्त कम रहेको पनि उनले बताए ।
