क्यान सक्रिय हुनसके नेपाली क्रिकेटको सफलता टाढा छैन : सुवास शाही

खरीबोट
ad

सुवास शाही नेपाली क्रिकेटको व्यवस्थापकीय क्षेत्रकै चर्चित नाम हो । उनी उमेरले अनुभवी होइनन् तर व्यवहार र बौद्धिकताले उनी व्यवस्थापनमा कुनै विज्ञभन्दा कम छैनन् । उनी एक जोसिला युवा हुन् । धनगढीमा जन्मिएका शाही धनगढी क्रिकेट एकेडेमीका अध्यक्ष समेत हुन् । उनले नेपालको सुस्ताएको क्रिकेटलाई माथि उकास्न ठूलो योगदान दिएका छन् । क्रिकेट क्षेत्रमा सन् २०१० बाट लागेका उनले पहिलोपटक २०१० मा एसपीए कप क्रिकेट गराए । सुदूरपश्चिमाञ्चल क्याम्पसले उनलाई साथ दिएको थियो । पहिलो खुट्किलोमै नरोकिई उनी निरन्तर क्रिकेटमा नयाँ नयाँ परीक्षणहरु गर्दै गए । हरेक पाइलाहरुमा सफलता हासिल गर्दै गए ।

विभिन्न चरणमा आईसीसीका मापदण्डहरु पहिल्याउँदै गए । शाहीकै अभियानस्वरुप धनगढीमा ड्रिम फाप्ला प्रोजेक्ट सञ्चालनमा छ । फाप्लालाई अन्तर्राष्ट्रिय क्रिकेट मैदानका रुपमा विकास गरी नेपालमै उत्कृष्ट क्रिकेट मैदानको निर्माणमा लागेका छन् उनी । यो वर्ष उनकै व्यवस्थापकीय नेतृत्वमा आगामी चैत १७ देखि धनगढीमा हुने धनगढी प्रिमियर लिग हुँदै छ ।  खेल १४ दिनसम्म सञ्चालन हुने प्रतियोगिताको पुरस्कार राशि पनि पहिलेभन्दा दुई गुणा बढाइएको छ । विजेतालाई २५ लाख र उपविजेतालाई १० लाख पुरस्कार दिने घोषणा गरिएको छ ।

एकताका लागि क्रिकेटको रुपमा लिने शाही  ‘क्रिकेट फर युनिटी’ नारा दिएर नेपाली क्रिकेटको उन्नतिका खातिर लागिपरेका छन् । देशका विभिन्न ठूला सहरहरुबाट छवटा टिम डीपीएलमा सहभागी हुँदैछन् । डीपीएलको फ्रेन्चाइज तरिकाबाट अक्सन गरेर पहिलो संस्करणबाट नै नयाँपन दिइसकेको प्रतियोगितासँग जोडिएका उनै शाहीसँग खरीबोट डटकमका सन्तोष राज पाण्डेले गरेको कुराकानीको सम्पादित अंश – 

डीपीएलको तयारी कस्तो भइरहेको छ ?

तयारी एकदमै राम्रो भइरहेको छ । महत्वपूर्ण काम खेलाडी छनोट अक्सन गरेर केही दिनअगाडि सम्पन्न गरिसक्यौँ । मैदानको तयारी लगायतका कुराहरु अहिले भइरहेका छन् ।

डीपीएल २ को अक्सनपछिको प्रतिक्रिया कस्तो आएको छ ?

एकदमै राम्रो आइरहेको छ । किनभने हामीले धनगढी प्रिमियर लिगमा स्थानीयस्तरमा अक्सनको प्रयोग गरेका थियौं । गत वर्ष मात्र हामीले पहिलोपटक राष्ट्रियस्तरको अक्सन र पहिलोपटक सिटी बेष्ड फे्रन्चाइजका अवधारणामा स्पर्धा गर्ने जमर्को गर्यौं । त्यसैले नै पहिलो संस्करणको अक्सनबाट हामीले राम्रो प्रतिक्रिया पाइसकेका थियौं । त्यही कुरालाई निरन्तरता दिन यसपटक पनि अक्सन गर्यौैँ । यसपालि पनि र सँगसँगै खेलाडीको पारिश्रमिक पनि गत वर्षभन्दा दोब्बर बढायौं । मुख्य कुरा खेलाडीहरुलाई खुसी गराउन गरेको कुरा हो । खेलाडीहरु व्यावसायिक हुनुपर्छ भन्ने नै हाम्रो मूलभूत उद्देश्य हो । अहिले खेलाडीहरु खुसी छन्, खेलाडी खुसी हुनु नै हामी सबैको खुसीको कुरा हो ।

क्यानले क्रिकेट प्रतियोगिता नगरिरहेका बेला डीपीएल, ईपीएललगायतका टुर्नामेण्टहरुले नेपाली क्रिकेट बचाइरहेको छ । यो बारेमा तपाईंको प्रतिक्रिया के छ ?

क्रिकेटको एकदमै राम्रो सम्भावना छ । जुन किसिमको क्रिकेटको माहोल छ नेपालमा, त्यसअनुसार त हाम्रो देशमा यस्ता प्रतियोगिताहरु १० वर्ष अगाडि नै भइसक्नुपर्ने थियो । जुन किसिमको क्रिकेट कल्चर छ हाम्रो यहाँ, जुन किसिमको फ्यान फ्लोइङ छ, त्यसअनुसार सँगै खेल्न थालेको र हामीभन्दा पछि खेल्नथालेका राष्ट्रहरुले टेष्ट मान्यता पाइसक्दा हामी जहाँको त्यहाँ नै छौँ । यस्तो फ्यान फ्लोइङ अन्य ठाउँमा कहीँ हुँदैन । यस्तो माहोल छ कि बच्चा आफैँ सानैदेखि ब्याट समात्छ । उसलाई कसैले कर गर्नुपर्दैन । त्यस्तो अवस्थामा यसलाई अलिकति व्यवस्थापन गर्न सक्ने हो भने नेपाली क्रिकेटको भविष्य एकदमै सुन्दर छ । अझै पनि केही ढिलो भएको छैन । अझै सबैजना आ—आफ्नो ठाउँबाट  सिरियस हुने बेला आएको छ । राज्य पक्ष, सरकार, क्रिकेट संघहरु र प्राइभेट क्षेत्रबाट सबै जना लगानी गर्न तयार छन् । डीपीएलले नै सेट गरिसक्यो प्राइभेट सेक्टरहरु नेपाली क्रिकेटमा ठूलो लगानी गर्न तयार छन् । त्यसमा आधिकारिक संस्था हुने हो भने अझै ठूलो लगानी आउँछ । सबै मिलेर अगाडि बढ्ने हो भने अझै ढिलो भएको छैन । क्रिकेटले नेपाललाई अन्तर्राष्ट्रिय क्षेत्रमा चिनाउने मात्र होइन, नेपालको पर्यटन विकासमा समेत टेवा पुर्याउनेछ ।

डीपीएलको अवधारणा कसरी आयो ?

आजभन्दा आठ वर्षअगाडि हामीले एसपीए कप —२०१० भन्ने प्रतियोगिता सुरु गर्यो, कलेजस्तरीय टुर्नामेण्ट, त्यहाँदेखि नै हामीले प्रत्येक संस्करणमा केही न केही नयाँ गर्नुपर्छ भनेर अगाडि बढ्यौं र त्यो नयाँ गर्ने सोचले नै हामीले अक्सनको प्रयोग गर्यौँ । डीपीएलमा फ्रेन्चाइजको अवधारणाको प्रयोग गर्यौँ । पुरस्कार राशिमा पनि आकर्षक बनाउन ध्यानमा राख्यौँ । यी सबै कुरालाई बढाउँदै लिने क्रममा अथवा केही नयाँ गर्ने सोचले नै यतिसम्म गर्न भ्याएका हौं । खेललाई व्यावसायिक बनाउनुपर्छ भनेर नै हो । एसपीए कप गर्दा टिममा भएका केही खेलाडीले मात्रै पारिश्रमिक पाउथे । केहीले विना पारिश्रमिक खेल्ने अवस्था हुन्थ्यो । अक्सन गर्दा यसले सबैको पारिश्रमिकता सुनिश्चित गर्ने भयो । क्रिकेटलाई व्यावसायिक बनाउनलाई र नयाँ युगजस्तो सुरु गर्नलाई हामीले अक्सनको प्रयोग गर्यौँ र त्यो सफल प्रयोगमा आयो । जुन रफ्तारमा हामी यसलाई अगाडि बढाइरहेका छौं । त्यसले भोलिका दिनमा खेलाडीले करोडौं कमाउने दिन पनि टाढा छैन ।

डीपीएलको आर्थिक पाटोको व्यवस्थापन कसरी भइरहेको छ ?

यो क्रिकेटलाई हामी इभेन्टभन्दा पनि यसलाई हामी अभियानको रुपमा अगाडि बढाइरहेका छौं । किनभने धनगढीबाट आएर त यतिधेरै गर्न सकिन्छ भने अरुले किन सक्दैनन् भन्ने एउटा उदाहरण पनि हो । खासमा डीपीएल भनेको धनगढीमा फाप्ला अन्तर्राष्ट्रिय रंगशाला बनाउनका लागि एउटा दबाबका रुपमा अगाडि बढाउन यो प्रतियोगिता गरिएको हो । अहिले डीपीएलको टिकेट काटेर भए पनि दर्शकहरु हेर्न पुगे । र सानो ठाउँ भएकाले टिकेट काटेर पनि हेर्न पाएनन् । भनेपछि डेफिनेट्ली धनगढीमा फाप्ला मैदान बनाउनुपर्छ भन्ने दबाब हो । र यसलाई हामीले जहिले पनि लगानीका रुपमा लियो । यसलाई घाटा नाफाको कुरा छैन, व्यापार भए न घाटा नाफाको हिसाब राख्ने हो । खेलकुद क्षेत्र भनेकै योगदान गर्ने क्षेत्र हो । राष्ट्रका लागि केही गर्ने क्षेत्र हो क्रिकेट, यसको रिटर्न डेफिनेटली पाएका छौँ ।

धनगढी आज क्रिकेटको सहर भनेर चिनिन्छ । धनगढी र क्रिकेट एउटा पर्यायवाची शब्द बनिसकेको छ । सुदूरपश्चिममा यो टुर्नामेण्ट हुँदा लाखौं करोडौंको व्यापार हुन्छ, होटल व्यवसायदेखि लिएर त्यहाँका पर्यटकीय गन्तव्यहरु व्यस्त  रहन्छन् । यसले हरेक क्षेत्रलाई राम्रो प्रभाव पारेको छ । त्यो रिटर्न हामीले हेर्ने हो । एउटा व्यक्तिले पाउने फाइदा हामीले हेर्ने होइन । समग्रमा समाजले कस्तो फाइदा पाउँछ भन्ने हो र त्यसमा हामीले साँच्चिकै फाइदा पाएका छौँ । र हामी खुसी छौँ । आर्थिक व्यवस्थापन गर्ने कुरामा हामीले थुप्रै स्पोन्सर पाएका छौं । तर, पनि हाम्रो क्रिकेट जहाँ पुग्नुपर्ने त्यहाँभन्दा हामी निकै पछाडि छौं । त्यसले गर्दा पनि हामीले यसलाई ग्रो गर्दै जानुपर्छ । एउटा ठाउँमा राख्यो भने त पक्कै पनि फाइदा नै होला, पैसा पनि आउला तर, त्यसले लङ ग्रोथ हुँदैन । कुनै पनि काम गर्दा खेरी कम्प्रोमाइज गर्नहुँदैन । त्यसका लागि लगानी हुन्छ । धन्यवाद दिन्छु टिमका ओनरहरुलाई जसले एउटा ठूलो दायित्व धानेको छ । टुर्नामेण्टको ठूलो दायित्व धानेको छ । खेलाडीहरुलाई किन्ने पैसाहरुदेखि उनीहरुको व्यवस्थापनमा खर्च गर्छन्, लाखौं करोडौं खर्च गर्छन् टिममा मिलेर । त्यो पनि एउटा महत्वपूर्ण लगानी हो हाम्रो लागि ।

टुर्नामेण्टबाट फाइदा भयो भने ?

यदि यसबाट पैसा बच्छ भने त्यो पनि हामीले क्रिकेटमै लगानी गर्ने हो । हामीले क्रिकेट एकेडेमीका खेलाडीहरुको विदेश भ्रमणमा खर्च गरौंला वा खेलको स्तरोन्नतिका लागि खर्च गर्छौँ । फाप्ला अन्तर्राष्ट्रिय रंगशालाका लागि खर्च गर्छौँ । अहिले पनि क्रिकेटको पैसा फाप्ला क्रिकेट मैदानका लागि टिकटको २० प्रतिशत छुट्याएका छौं । किनकि क्रिकेटले केही पैसा कमिन्छ भने त्यो पनि क्रिकेटमै लगाउनुपर्छ भन्ने हाम्रो उद्देश्य हो ।

नेपाल विश्वकप छनौट खेल्न जिम्बाब्बेमा छ, विश्वकपका लागि छनोट हुने सम्भावना कतिको देख्नुहुन्छ ?

एकदम राम्रो सम्भावना छ । हाम्रो खेलाडीहरुको मेन्टालिटी पनि बलियो छ । र जुन क्वालिफाएरमा पुगे, डिभिजन टु जितेर आए, त्यो जुन मुभमेन्ट पाए, त्यसले गर्दा पनि नेपाल कम्तीमा पनि ओडीआई स्टाटस लिएरै आउँछ भन्नेमा विश्वस्त छु ।

तर यता क्यानको विवाद टुंगिएकै छैन, यसले कस्तो असर गर्छ ? 

क्यानको जुन यो विवाद छ । त्यो जतिसक्दो चाँडो अन्त्य हुनुपर्छ । गभर्निङ बडी नै स्ट्रोङ हुनुपर्छ । भोलिका दिनहरुमा यस्ता यस्ता लिगहरु अझ गभर्निङ बडीले गर्ने हो भने पनि त्यो अझै दीर्घकालीन र अथेन्टिक हुन्छ । हामीले क्यान नभएको खण्डमा क्रिकेटलाई बचाइराख्न गरेका हौं । यही इनिसिएसन क्यानले लिन्छ भने हामी सबैभन्दा खुसी हुन्छौँ । किनभने हामीले त एउटा एक्जाम्पल क्रिएट गर्न खोजेको हो । क्यान नभइरहेका बेला सबै जना चुप लागेर त हुँदैन, त्यो बेलामा क्रिकेटलाई गतिमान् बनाउन यो स्पर्धा गरेका हौं । भोलिका दिनमा गभर्निङ बडीले गर्छ भने वा भोलिका दिनमा हामीले क्रिकेट प्रतियोगिता गर्नु नपरोस्, त्यो हाम्रो सफलता हो । क्रिकेट गभर्निङ बडीले इनिसिएसन लेओस् । त्यसपछि हामी पनि अन्य कुरामा ध्यान दिन पाउँछौं । क्रिकेटको संस्थागत विकास हुनुपर्छ भन्नेमा हामी पनि सिरिएस छौं । क्यानको यो विवादको अन्त्य हुनुपर्छ । क्रिकेट एकेडेमीले यति ठूलो कार्यक्रम गर्न सक्छ भने क्यानले नै चाह्यो भने के गर्न सक्दैन भन्नुहोस् त ?

नेपालका युवा स्पिनर सन्दीप लामिछाने आईपीएलमा छानिएका छन्, उनको यात्राले नेपाली क्रिकेटमा कस्तो फाइदा पुर्याउला ?

 सन्दीप लामिछाने ट्यालेन्ट खेलाडी हुन् । जतिखेर सन्दीप लामिछानेलाई क्याम्पा चौरबाट पुवुदु सरले ‘पिक’ गरेका थिए । त्यो टुरमा म पनि सँगै थिए । उहाँ (पुबुदु दासनायके) एकदमै ट्यालेन्ट कोच हुनुहुन्थ्यो । एकै नजरमा प्रतिभालाई चिन्नुहुन्थ्यो । र उहाँले त्यतिबेला नै भन्नुभएको थियो । सन्दीप लामिछाने नेपालको भविष्य हो भनेर उहाँले भन्नुहुन्थ्यो । नभन्दै सन्दीप आईपीएल खेल्ने तयारीमा छन् । उनको छनोटले अब आउने खेलाडीहरुका लागि क्रिकेटमा लाग्ने खेलाडीको के विश्वास हुन्छ भने नेपाली पनि आइपीएल खेल्न सक्छ है भनेर थुपै्र नयाँ आउने खेलाडीका लागि पनि बाटो खोलिदिएका छन् । सन्दीपको आइपीएल यात्राले नेपालको क्रिकेट र नेपालको पहिचानलाई नै नयाँ उचाइमा पुर्याउने विश्वास छ ।

सन्दीपले आइपीएलमा खेल्ने मौका पाउलान् ?

क्रिकेटमा एकदमै ट्यालेन्ट खेलाडी हुन् । डिभिजन टुमा पनि म्यान अफ द सिरिज भएका छन् । उनको खेलमा पनि दिल्ली डेयर डेभिल्सले कन्टिन्युली उसको खेललाई फ्लोअप गरिरहेको थियो । डेफिनेटली उनले चान्स पाउँछन् । पाएको चान्सललाई सदुपयोग गर्छन् भन्ने कुरामा पनि म विश्वस्त छु ।

डीपीएलले सामाजिक आर्थिक क्षेत्रमा कस्तो प्रभाव पार्छ ?

पक्कै पनि डीपीएल ग्राउण्डमा खेलिने खेल मात्र होइन् । यो ग्राउण्ड बाहिरको जुन इम्प्याक्ट छ नि ! जस्तो होटल व्यवसायमा पार्ने इम्प्याक्ट, पर्यटनमा पार्ने इम्प्याक्ट, आर्थिक क्रयाकलापमा पार्ने इम्प्याक्ट, त्यहाँको रोजगारीमा पार्ने इम्प्याक्ट कुनै पनि क्षेत्र बाँकी रहँदैन, जहाँ त्यो प्रतियोगिताले प्रत्यक्ष वा अप्रत्यक्ष प्रभाव नपारेको । त्यसले गर्दा हाम्रो फोकस अथवा यो अभियान हो र अभियानको फोकस क्रिकेटलाई मात्र अघि बढाउने र अरु क्षेत्रलाई वास्ता नगर्ने भन्ने हुँदैन । हाम्रो सुदूरपश्चिमको, धनगढीको आर्थिक क्रियाकलापलाई पनि चलायमान बनाउने । त्यहाँका पर्यटकीय गन्तव्यहरुको पहिचान बढाउने सँगसँगै डीपीएलले एउटा कनेक्टिभिटी युनाइट गरेको छ, जस्तो भनौं न रुपन्देहीको टिम, विराटनगरको टिम, काठमाडौंको टिम, बाहिरको सहरको टिमहरु सुदूरपश्चिममा आएर खेलिरहेका छन् भने एकअर्काबीच कनेक्टिभिटी गरेको छ । एकअर्काका पहिचान, एउटा सहरको मान्छेको अर्को सहरको मान्छेहरुको पहिचान त्यहाँ एकताको काम पनि गरेको छ । सँगसँगै स्पोन्सरको रुपमा कोही वीरगञ्जमा अवस्थित कम्पनीहरु त कोही पोखरामा रहेका कम्पनीहरु जस्तै पोखराबाट प्याराभिट जान्छ ।

काठमाडौंका ठूला कम्पनीहरु पनि कनेक्ट हुँदाखेरी सबैलाई युनाइट गरेको छ । एक ठाउँमा केन्द्रित गराएको छ डीपीएलले । ठूलठूला कम्पनीहरुको लगानी पनि सुदूरपश्चिममा भित्र्याएको छ । यसले समाजमा ठूलो इम्प्याक्ट पारेको छ । यो एउटा उदाहरण मात्र हो । यो धनगढी क्रिकेट एकेडेमीले गरेको इनिसिएसिङ हो । यही कुरालाई अझै ठूलो हामी गर्न सक्छौँ । अहिले हामीले अन्तर्राष्ट्रिय फाप्ला क्रिकेट मैदानको कुरा गरिरहेका छौं । त्यसलाई हामीले न्युट्रल भेन्यू बनाउनुपर्छ भनेर भनेका छौं । पाकिस्तान र इन्डियाको न्युट्रल भेन्यु बनाउन सक्छौं । किनभने आज पाकिस्तान र इन्डिया दुवैमा गएर खेल्दाखेरी त्यहाँ क्राउड हँुदैन । तर, नेपालमा त क्राउड छ नि, हाम्रो स्टन्ट भनेको त्यो हो । हामीसँग क्राउड छ । पाँच सय हजार रुपैयाँको टिकेट काटेर पनि हेर्न सक्छ । भनेपछि भोलि त्यो गेम नेपालमा हुने हो भने पनि र नेपालमा अन्तर्राष्ट्रिय खेलहरु फाप्लामा भोलि गराउने ट्राइ गर्छौं । त्यो भएपछि हामीलाई अर्बौँको इम्प्याक्ट छ । करोडौं रुपैयाँ त हैन, गेट मनिबाट मात्र हुन्छ भनेपछि अप्रत्यक्ष हजारौं रोजगारी यसले सृजना गर्छ । र पर्यटकीय क्षेत्रमा भ्रमण गर्नेहरुको संख्या पनि बढ्दै जान्छ र सुदूरपश्चिममा यस्ता इभेन्टहरु हुन जरुरी छ । र नेपाललाई नै क्रिकेटले व्यावसायिक नयाँ उचाइमा पुर्याउन सक्छ ।

अन्त्यमा, स्थानीय क्रिकेट खेलाडीको प्रवद्र्धनका लागि के गरिरहनुभएको छ ?

हाम्रो क्रिकेट एकेडेमीको उद्देश्य नै हामीले डीपीएल त गर्छौं गर्छौं डीपीएल त प्लेटफर्म हो । सँगसँगै रेगुलर ट्रेनिङ गराउँछौँ । क्रिकेट एकेडेमीले आजभन्दा चार वर्ष अगाडिदेखि नै नियमित बिहान बेलुका प्रशिक्षण गराउँछौँ । भर्खर मात्रै हाम्रो उत्पादन यु—१६ टिमलाई सुवास ऐर र नारायण जोशीको रुपमा दिन सफल भयौं । उनीहरु अहिले डीपीएलमा पनि खेल्न छनोट भएका छन् । त्यसले गर्दा एकेडेमीले थुप्रै खेलाडी जन्माएको छ । विगतमा पनि र एकेडेमीले गरेको डीपीएलजस्तो प्रतियोगिता र एसपीए कप जसलाई सुदूरपश्चिमाञ्चल क्याम्पसले आयोजना गरे । त्यो प्रतियोगिताबाट थुप्रै खेलाडीहरुले प्लेटफर्म पाए । र आफूलाई लाइमलाइटमा ल्याउन सफल भएर नेपाली टिममा छनोट भएका हुन् । त्यसले गर्दा हामी सबैभन्दा खुसी तब हुन्छौँ, जब हाम्रो एकेडेमीबाट आएका खेलाडीले राष्ट्रिय टिमको जर्सी लगाउँछन् ।

सम्बन्धित समाचार

एसिया कप क्रिकेटमा श्रीलङ्का दोश्रो पराजयसंगै प्रतियोगिताबाट बाहिर

यूएई । अफगानिस्तानले एसिया कप क्रिकेटमा पाँच पटक च्याम्पियन भइसकेको श्रीलङ्कालाई सोमबार ९१ रनले पराजित गरेको छ । पहिलो खेलमा बङ्गलादेशसँग पराजित भएको श्रीलङ्का यो हारसँगै एसिया कप क्रिकेट प्रतियोगिताबाटै

इङल्याण्डका क्रिकेटर मोइन अलीलाई अस्ट्रेलियन खेलाडीले 'ओसामा' भनेको खुलासा 

काठमाडौँ। इङल्याण्डका क्रिकेटर मोइन अलीले आफुलाई खेलको दौरान ऑस्ट्रेलीयन खेलाडीले ओसामा भनेर सम्बोधन गरेको आरोप लगाएका छन्। अलीले लेखेको आत्मकथा मोइनमा आफु २०१५ मा अस्ट्रेलियाविरुद्ध भएको खेलमा नश्लभेदको शिकार भएको

साइकल चढेर नेपालको फन्को मार्दै ओम प्रकाश 

काठमाडौं । हरेक मान्छेका आफ्नै इच्छा हुन्छ । त्यही इच्छा पूरा गर्न मानिसले के गर्दैन ? जे पनि गर्न तयार हुन्छ। धेरैले पैसा कमाउँँदा सुख र सन्तुष्टि मिल्ने ठान्छन् तर जीवनमा

एशिया कप क्रिकेट आजदेखि सुरु हुदै, यस्तो छ खेल तालिका 

काठमाडौं । आजदेखि युएईमा एसिया कप क्रिकेट शुरु हुदै छ । आजदेखि २८ सम्म हुने प्रतियोगितामा एसियाका टेष्ट खेल्ने पाँच राष्ट्र र छनोट भएर जाने एक देश हङकङ गरी कुल ६