- २०८१ जेठ १ मंगलबार
काठमाडौँ । पूर्वअर्थमन्त्री जनार्दन शर्मामाथि छानबिन गर्नका लागि गठित संसदीय विशेष समितिको पहिलो बैठक आज बस्दैछ । मंगलबार दिउँसो सिंहदरबारस्थित संघीय संसद सचिवालयमा बस्ने बैठकमा समितिको कार्यविधि र सभापति चयन गर्ने कार्यसूची रहेको छ ।
आजको बैठक लक्ष्मणलाल कर्णको अध्यक्षतामा बस्ने बताइएको छ । बैठकले सुरुमा समितिको कार्यविधि पारित गर्नेछ भने त्यसलाई पारित गर्ने र सभापति चयन गर्ने आजको बैठकको तयारी रहेको बुझिएको छ ।
तत्कालीन अर्थमन्त्री शर्मालाई जेठ १४ मा आगामी आर्थिक वर्षको बजेटका करका दर हेरफेर गर्ने क्रममा अनधिकृत व्यक्ति प्रवेश गराएको आरोप लागेको छ । त्यो घटनामाथि छानबिन गर्नका लागि प्रतिनिधिसभाले संसदीय विशेष समिति गठन गरेको थियो । असार २२ गते गठित समितिमा ११ सदस्य रहेका छन् ।
समितिमा खगराज अधिकारी, देवप्रसाद गुरुङ, पुष्पा भुसाल, प्रदीप ज्ञवाली, भानुभक्त ढकाल, विमला विक, लक्ष्मणलाल कर्ण, शक्ति बस्नेत, सरलाकुमारी यादव, सिताराम महतो र सुरेन्द्र यादव रहेका छन् ।
समितिको सचिवमा संसद सचिवालयका सहसचिव सुरेन्द्र अर्याल तोकिएका छन् ।
प्रतिनिधिसभाले छानबिनका लागि विशेष समिति गठन गरेपछि शर्माले असार २२ गते बुधबार अर्थमन्त्रीबाट राजीनामा दिएका थिए ।
