- २०८१ बैशाख १५ शनिबार
काठमाडौँ । म्यानमारको एक अदालतले अपदस्थ नेतृ आङ सान सुकीलाई भ्रष्टाचारको थप अभियोगमा दोषी ठहर गरेको छ ।
अदालतले उनको सजाय ६ वर्ष बढाउने निर्णय गरेको हो । यसअघि अप्रिल २०२२ मा अदालतले अपदस्थ नेतृ आङ सान सुकीलाई भ्रष्टाचारको पहिलो मुद्दामा पाँच वर्षको जेल सजाय सुनाएको थियो। म्यानमारको सैन्य सरकारले सुकी विरुद्ध बन्द ढोकामा परीक्षण गरिरहेको छ ।
म्यानमारका कानुन अधिकारीले सुकीलाई भ्रष्टाचारको आरोपमा दोषी ठहर गरेको बताएका छन् । नोबेल पुरस्कार विजेता सु विरुद्धको ११ भ्रष्टाचार मुद्दामध्ये यो पहिलो हो, जसमा प्रजातन्त्र समर्थक नेतालाई सजाय सुनाइएको छ । यी मुद्दाहरूमा प्रत्येकमा अधिकतम १५ वर्षको सजाय हुन्छ ।
यसअघि सन् २०२२ को जनवरीमा सुकीलाई गैरकानूनी रूपमा वाकी-टकीहरू आयात र राख्ने र कोरोना प्रतिबन्धहरू उल्लङ्घन गरेको आरोपमा चार वर्षको जेल सजाय सुनाइएको थियो । जस अनुसार फेब्रुअरी १, २०२१ मा सैनिक विद्रोहको दिन सु कीको निवासमा सैनिकहरूले छापा मार्दा सुकीलाई वाकी-टकी गरेको आरोप लगाइएको थियो । त्यस क्रममा कथित रूपमा प्रतिबन्धित उपकरण बरामद भएको थियो ।
जुन्टा सेनाद्वारा सुकीको सरकारलाई अपदस्थ गरेलगत्तै, म्यानमारले सैन्य शासनको बिरूद्ध व्यापक विरोध प्रदर्शनलाई दबाउन रक्तपातको बाटो रोजेको थियो । यस हिंसामा अहिलेसम्म १५ सय जनाको मृत्यु भइसकेको छ । सुकीले करिब एक दर्जन मुद्दाको सामना गरिरहेकी छिन्, जसमा अधिकतम १०० वर्षभन्दा बढी जेल सजाय हुने बताइएको छ । सुकीलाई सैन्य सरकारले अज्ञात स्थानमा राखेको छ ।
चीनको सैन्य शासकलाई सहयोग
१ फेब्रुअरी २०२१ मा, म्यानमारको सेनाले निर्वाचित सरकारलाई ध्वस्त पारेर सत्ता हातमा लियो । यसपछि प्रजातन्त्र पक्षधर आङ सान सुकीलगायत धेरै ठूला नेताहरु जेल परेका थिए । त्यसयता उनले चीनबाट निरन्तर सैन्य र अन्य प्रकारको सहयोग प्राप्त गर्दै आएका छन् । हालै चीनले म्यानमारको सैन्य शासनका लागि सहयोग बढाएको छ । यस अडानले म्यानमारका सैन्य शासकहरूलाई अन्तर्राष्ट्रिय रूपमा एक्लो पार्ने प्रयासमा चीन सबैभन्दा ठूलो बाधा बनेको विज्ञहरू बताउँछन् ।
