- २०८१ बैशाख १५ शनिबार
काठमाडौँ । अमेरिकी प्रविधि कम्पनी एप्पलले आफ्नो विद्युतीय कार परियोजना बन्द गर्ने निर्णय गरेको छ । कम्पनीले विगत एक दशकदेखि यस परियोजनामा काम गरिरहेको थियो तर अहिलेसम्म भौतिक प्रोटोटाइप तयार गर्न समेत सकेको छैन ।
एप्पलको यो निर्णयले कम्पनीको पहिलो ईभी प्रोजेक्ट ‘टाइटन’ मा काम गरिरहेका स्पेशल प्रोजेक्ट ग्रुप (एसपीजी) का करिब २००० कर्मचारीलाई असर पर्नेछ ।
मिडिया रिपोर्टका अनुसार यो निर्णय मंगलबार परियोजनामा काम गर्ने कर्मचारीहरूसँग मुख्य अपरेटिङ अफिसर जेफ विलियम्स र प्रोजेक्टका उपाध्यक्ष केभिन लिन्चले साझा गरेका थिए । दुबै कम्पनीका अधिकारीहरूले कर्मचारीहरूलाई एसपीजीका सबै कर्मचारीहरूलाई जेनेरेटिभ आर्टिफिसियल इन्टेलिजेन्स (एआई) डिभिजनमा जोन जियानान्ड्रिया अन्तर्गत सारिने बताएका छन् ।
कम्पनी पूर्ण रूपमा स्वचालित र भ्वाइस कमाण्डमा चल्ने कार बनाउने प्रयास गरेको थियो । यसका लागि २०१५ मा सुरु भएको यो आयोजनामा अर्बौं लगानी भएको थियो । यो परियोजना सफल भएको भए कम्पनीले एक लाख डलरको मूल्यमा सन् २०२८ सम्ममा कार लन्च गर्न सक्ने थियो ।
एप्पलले आफ्नो पहिलो ईभीको लन्च मिति २०१९, २०२०, २०२६ र २०२८ मा रिसेट गरेको थियो । प्रतिवेदनका अनुसार कम्पनीको बोर्डले सीईओ टिम कुकलाई आयोजनाको छिट्टै ठोस योजना बनाउन वा बन्द गर्न दबाब दिइरहेको थियो ।
एप्पलले सन् २०२६ मा पूर्णतया अटोमोटिभ ड्राइभ विकल्पसहितको स्टीयरिङ ह्वील बिनाको ईभी बजारमा ल्याउने बताएको थियो ।
