- २०८३ जेठ १५ शुक्रबार
काठमाडौँ । बलिवुडका फिल्म निर्माता वाशु भगनानीले टिप्स म्युजिक कम्पनी, रमेश तौरानी, कुमार एस तौरानी र निर्देशक डेविड धवनविरुद्ध ४०० करोड भारुको मुद्दा दायर गरेका छन् ।
यो विवाद मुम्बई उच्च अदालतसम्म पुगेको छ । पूजा इन्टरटेनमेन्ट (इन्डिया) लिमिटेडका तर्फबाट दायर गरिएको उक्त मुद्दा चलचित्र र संगीत अधिकारसम्बन्धी विवादसँग जोडिएको बताइएको छ ।
मुद्दाको मुख्य कारण अभिनेता वरुण धवनको प्रदर्शनको तयारीमा रहेको फिल्म ‘है जवानी तो इश्क होना है’ रहेको बताइएको छ । आरोपअनुसार फिल्ममा वाशु भगनानीको पुरानो फिल्म ‘बीवी नम्बर १’ का लोकप्रिय गीतहरू ‘चुनरी चुनरी’ र ‘इश्क सोना है’ अनुमति बिना यस फिल्ममा प्रयोग गरिएको बताइएको छ । भगनानी पक्षले यी गीतहरूको प्रयोग बिनाअनुमति गरिएको भन्दै तत्काल रोक लगाउन माग गरेको छ । साथै, फिल्मको प्रचार सामग्रीबाट ती गीत हटाउन र फिल्मको शीर्षक समेत परिवर्तन गर्न माग गरिएको छ ।
वाशु भगनानीका वकिलका अनुसार, पहिलेको सम्झौतामा केवल अडियो अधिकार मात्र दिइएको थियो, तर पछि भिडियो अधिकारका लागि भएको संवाद निष्कर्षमा पुगेको थिएन । उनले कम्पनीले आफ्नो कानुनी अधिकार प्रमाणित गर्न आवश्यक कागजात प्रस्तुत गर्नुपर्ने पनि बताएका छन् ।
यसैबीच, पूजा इन्टरटेनमेन्टले थप १०० करोड रुपैयाँ क्षतिपूर्तिको मागसमेत गरेको छ । कम्पनीले टिप्स म्युजिक र डेविड धवनले बौद्धिक सम्पत्ति अधिकारको गैरकानुनी प्रयोग गरेको आरोप लगाएको छ ।
यो मुद्दासँगै बलिउडमा संगीत अधिकार र फिल्म सामग्री प्रयोगसम्बन्धी विवाद फेरि चर्किएको छ ।
