- २०८३ जेठ १७ आइतबार
काठमाडौँ । दक्षिणी लेबनानमा भएको सैन्य कारबाहीका क्रममा एक इजरायली सैनिकको मृत्यु भएको छ । इजरायली सेनाका अनुसार शनिबार भएको घटनामा २१ वर्षीय सैनिक मारिएका हुन् भने अन्य चार सैनिक घाइते भएका छन् ।
अल जजिराका अनुसार सैनिकको मृत्यु मानवविहीन आक्रमणकारी विमानको आक्रमणमा भएको हो। घाइते सैनिकहरूको उपचार भइरहेको जनाइएको छ ।
इजरायली सेनाकी प्रवक्ताले दक्षिणी लेबनानमा ठूलो स्तरको सैन्य अभियान सुरु गरिएको जानकारी दिदै अभियानको मुख्य उद्देश्य सशस्त्र संरचनाहरू ध्वस्त पार्नु तथा आक्रमणकारी समूहलाई समाप्त गर्नु रहेको बताएका छन् ।
उनका अनुसार दक्षिणी लेबनानमा सैन्य नियन्त्रण थप बलियो बनाउन यो कारबाही सञ्चालन गरिएको हो । सेनाले अग्रपंक्तिको सुरक्षा रक्षारेखा अगाडि बढाउने उद्देश्यसहित आक्रमण अभियान सञ्चालन गरिरहेको जनाएको छ ।
इजरायली सेना लितानी नदी पार गरिसकेको र अब नदीको उत्तर क्षेत्रमा रहेको हिजबुल्लाहविरुद्ध आक्रमण तीव्र बनाइएको बताइएको छ । साथै सैन्य कारबाही अन्य क्षेत्रमा समेत विस्तार हुँदै गएको सेनाले जनाएको छ ।
