- २०८३ असार २३ मंगलबार
2026-06-26-05-49-27.jpeg)
काठमाडौँ । जारी फिफा विश्वकप फुटबल अन्तर्गत अन्तिम १६ को अन्तिम खेलमा आज राति स्विट्जरल्यान्ड र कोलम्बिया आमनेसामने हुँदैछन् । क्यानडाको भ्यानकुभरस्थित बिसी प्लेस स्टेडियममा हुने यो खेल नेपाली समय अनुसार राति १: ४५ बजेदेखि शुरु हुदैछ ।
दुवै टोलीको लक्ष्य विश्वकपमा आफ्नो उत्कृष्ट प्रदर्शन दोहोर्याउँदै क्वार्टरफाइनलमा स्थान बनाउने रहेको छ ।
स्विट्जरल्यान्डका लागि यो रंगशाला परिचित रहेको छ । यस प्रतियोगितामा उनीहरूको लगातार तेस्रो खेल यही मैदानमा हुनेछ । समूह चरणको निर्णायक खेलमा आयोजक क्यानडालाई २-१ ले हराएको स्विट्जरल्यान्डले त्यसपछि अन्तिम ३२ को खेलमा अल्जेरियालाई २-० ले पराजित गर्दै सन् १९३८ यताकै पहिलो नकआउट जित दर्ता गरेको थियो । त्यो खेलमा ब्रिल एम्बोलो र डान न्दोयेले गोल गरेका थिए । विशेषगरी युवा खेलाडी योहान मान्जाम्बी उत्कृष्ट लयमा छन् । उनले यस विश्वकपमा तीन गोल र दुई गोलका लागि अवसर सिर्जना गर्दै पाँच प्रत्यक्ष गोल योगदान दिएका छन् । २० वर्ष २६१ दिनको उमेरमा उनले यो उपलब्धि हासिल गर्दै नयाँ कीर्तिमान बनाएका छन् । पछिल्लो ६० वर्षमा २१ वर्षभन्दा कम उमेरमा यसभन्दा बढी योगदान गर्ने खेलाडी जर्मनीका थोमस मुलर मात्र हुन्, जसले सन् २०१० मा पाँच गोल र तीन सहयोग गरेका थिए । एम्बोलोले विश्वकपमा आफ्नो चौथो गोल गरेका छन् । स्विट्जरल्यान्डका लागि विश्वकपमा उनीभन्दा बढी गोल गर्ने खेलाडी जोसेफ हुगी (६) र जेरदान साकिरी (५) मात्र छन् ।
यस विश्वकपमा स्विट्जरल्यान्डले पहिलो पटक एउटै संस्करणमा तीन खेल जितेको छ । साथै लगातार तीन खेल जित्ने उपलब्धि पनि पहिलो पटक हासिल गरेको हो । मुख्य प्रशिक्षक मुराट याकिनले विश्वकपमा टोलीको नेतृत्व गर्दै आठ खेलमध्ये पाँच जित निकालेका छन्, जुन स्विट्जरल्यान्डका कुनै पनि प्रशिक्षकको सबैभन्दा उत्कृष्ट जित प्रतिशत हो । यदि स्विट्जरल्यान्डले यो खेल जितेमा सन् १९५४ पछि पहिलो पटक क्वार्टरफाइनल पुग्नेछ । यसअघि टोली सन् १९३४, १९३८ र १९५४ मा अन्तिम आठमा पुगेको थियो ।
उता कोलम्बियाको लक्ष्य सन् २०१४ को सफल यात्रा दोहोर्याउने रहेको छ । त्यसबेला टोलीका प्रमुख खेलाडी रहेका कप्तान हामेस रोड्रिगेज अहिले पनि टोलीका मुख्य आधार हुन् । उनी विश्वकपमा कोलम्बियाका सबैभन्दा धेरै खेल खेल्ने खेलाडी बनेका छन् । यद्यपि घानाविरुद्धको अन्तिम १६ को खेलमा उनी पहिलो हाफपछि मैदानबाट बाहिरिएका थिए । घानाविरुद्ध जोन आरियासले खेलको १३ मिनेट ४९ सेकेन्डमा गरेको गोल विश्वकपमा कोलम्बियाको दोस्रो सबैभन्दा छिटो गोल हो । त्यो गोल लुइस स्वारेजको उत्कृष्ट पासमा सम्भव भएको थियो। स्वारेज खेल सुरु भएको छ मिनेटमै मैदान प्रवेश गरेका थिए र विश्वकप इतिहासमै वैकल्पिक खेलाडीबाट सबैभन्दा छिटो गोल योगदान गर्ने खेलाडी बने ।
कोलम्बियाले घानाविरुद्ध नकआउट चरणमा आफ्नो अहिलेसम्मकै सबैभन्दा उच्च आक्रमण क्षमता प्रदर्शन गरेको थियो । टोलीले लगातार तीन खेलमा २० वा सोभन्दा बढी प्रहार गरेको छ । तर ती अवसरबाट दुई गोल मात्र सम्भव भएकाले गोल गर्ने क्षमतामा भने सुधार आवश्यक देखिएको छ ।
रक्षात्मक रूपमा भने कोलम्बिया निकै बलियो देखिएको छ। टोलीले लगातार तीन खेलमा कुनै गोल नखाई जित निकालेको छ । यस विश्वकपमा स्पेन र मेक्सिकोले मात्र कोलम्बियाभन्दा बढी खेलमा गोल खानबाट जोगिएका छन् ।
स्विट्जरल्यान्ड र कोलम्बियाबीच यो पाँचौँ भेट हुनेछ । यसअघिका चार खेलमध्ये तीन मैत्रीपूर्ण थिए । पछिल्लो भेट सन् २००७ मा भएको थियो, जहाँ कोलम्बियाले ३-१ को जित निकालेको थियो । दुवै टोलीबीचको एकमात्र प्रतिस्पर्धात्मक खेल सन् १९९४ को विश्वकपको समूह चरणमा भएको थियो । त्यसबेला कोलम्बियाले २-० ले जित निकाले पनि प्रतियोगिताबाट बाहिरिनु परेको थियो ।
यद्यपि यस विश्वकपमा युरोपेली टोलीविरुद्ध कोलम्बियाको प्रदर्शन उत्साहजनक छैन । सन् २०२६ मा युरोपेली टोलीविरुद्ध खेलेका तीन खेलमध्ये उसले कुनै पनि जित्न सकेको छैन । क्रोएसिया र फ्रान्ससँग पराजित भएको कोलम्बियाले समूह चरणमा पोर्चुगलसँग गोलरहित बराबरी खेलेको थियो ।
स्विट्जरल्यान्ड उच्च आत्मविश्वासका साथ मैदानमा उत्रनेछ। लगातार तीन जित, सन्तुलित टोली, उत्कृष्ट लयमा रहेका युवा खेलाडी र बलियो आक्रमण उनीहरूको मुख्य शक्ति हो । कोलम्बियाको सबैभन्दा ठूलो बल भनेको उसको अनुशासित रक्षा पंक्ति हो । तर सिर्जना गरेका अवसरलाई गोलमा परिणत गर्न नसक्नु टोलीका लागि चिन्ताको विषय बनेको छ । यस कारण यो खेल निकै प्रतिस्पर्धात्मक हुने अपेक्षा गरिएको छ । स्विट्जरल्यान्ड आक्रमणमा धारिलो देखिएको छ भने कोलम्बिया रक्षामा मजबुत छ। क्वार्टरफाइनलको टिकट कसले हात पार्ने भन्ने निर्णय दुवै टोलीको सन्तुलित प्रदर्शनले गर्नेछ ।
