स्कट कुगेलिनलाई पुनः सुदूरपश्चिम रोयल्सबाट एनपीएल खेल्दै

काठमाडौं । नेपाल प्रिमियल लिग (एनपीएल) को तेस्रो सिजनको लागि सुदूरपश्चिम रोयल्सले न्यूजील्याण्डका बलर स्कट कुगेलिनलाई टिममा पुनः अनुबन्ध गरेको छ । गत सिजन पनि सुदूरपश्चिमको टिममा रहेका कुगेलिन टिममा फर्किएका हुन् ।

उनले पहिलो र दोस्रो सिजनको एनपीएल सुदूरपश्चिम रोयल्सबाटै खेलेका थिए । ३४ वर्षीय कुगेलिनले एनपीएलको पहिलो संस्करणमा १७ विकेट र दोस्रो संस्करणमा १० विकेट लिएका थिए ।

यसअघि सुदूरपश्चिमले इंग्ल्यान्डका सेफ जैबलाई तेस्रो संस्करणका लागि अनुबन्ध गरेको छ ।

दिपेन्द्रसिंह ऐरीको कप्तानीमा रहेको सुदूरपश्चिम रोयल्समा अभिनाश बोहरा, आरिफ शेख, विनोद भण्डारी, इसान पाण्डे, हेमन्त धामी, हिक्मत महरा, सचिन भट्ट, आयुब चन्द, अनिल खरेल, दिपक बोहोरा, मिलन बोहोरा र टेक रावतलगायतका खेलाडी रहेका छन् ।

एनपीएलको तेस्रो संस्करण आगामी कात्तिक ९ गतेबाट सुरु हुने तालिका सार्बजनिक भएको छ ।