- २०८३ असोज ७ बुधबार
काठमाडौँ । आज संघीय संसदका पाँच समितिको बैठक बस्दैछ ।
आज प्रतिनिधि सभाका चार समिति अर्थ समिति, महिला तथा सामाजिक मामिला समिति, राज्य व्यवस्था तथा सुशासन समिति र शिक्षा, स्वास्थ्य तथा सूचना प्रविधि समितिको र राष्ट्रिय सभाको संघीयता सबलीकरण तथा राष्ट्रिय सरोकार समितिको बैठक बस्न लागेको हो ।
आज बिहान १० बजेदेखि शुरु हुने अर्थ समितिको बैठकमा अर्थ सम्बन्धी केही नेपाल कानूनलाई संशोधन र खारेज गर्न बनेको विधेयकमाथि सैद्दान्तिक छलफल र उक्त विधेयकमाथि संशोधन प्रस्ताव दर्ता गराउने संशोधनकर्ता सदस्यहरुसँग छलफलको कार्यसूची रहेको छ ।
त्यस्तै, बिहान १० बजेदेखि शुरु हुने महिला तथा सामाजिक मामिला समितिको बैठकमा समितिमा प्राप्त मानव बेचबिखन तथा ओसारपसार (नियन्त्रण) (पहिलो संशोधन) विधेयक, २०८३ माथि प्रारम्भिक/सैद्धान्तिक छलफलको कार्यसूची रहेको छ ।
त्यसैगरी, विहान ११ बजेदेखि बस्ने राज्य व्यवस्था तथा सुशासन समितिको बैठकमा वैधानिक निकायका पदाधिकारीहरूको पारिश्रमिक, सेवाको शर्त र सुविधासम्बन्धी (पहिलो संशोधन) विधेयक, २०८३ उपर सैद्धान्तिक र संशोधन प्रस्तावकर्ता सदस्यसँग छलफलको कार्यसूची रहेको समितिले जानकारी दिएको छ ।
त्यस्तै, आज बिहान ८ बजेदेखि शुरु हुने शिक्षा, स्वास्थ्य तथा सूचना प्रविधि समितिको बैठकमा राष्ट्रिय विधि विज्ञान प्रयोगशाला (स्थापना र सञ्चालन) विधेयक, २०८१ मस्यौदा प्रतिवेदन माथि छलफलको कार्यतालिका रहेको छ ।
त्यसैगरी, आज बिहान ११ बजेदेखि शुरु हुने राष्ट्रिय सभाको संघीयता सबलीकरण तथा राष्ट्रिय सरोकार समितिको बैठकमा समितिको वार्षिक प्रतिवेदन सम्बन्धमा छलफलको कार्यसूची रहेको छ ।
