काठमाडौं । नेपाल प्रहरीको केन्द्रीय अनुसन्धान ब्युरो (सीआईबी)ले तत्कालीन पुनरावेदन अदालत पाटनबाट १० वर्ष कैद र ५० हजार जरिवाना पाएका एक फरार अभियुक्तलाई पक्राउ गरेको छ ।
प्रहरीले सिन्धुपाल्चोकका भरत भन्ने माइला लामालाई काठमाडौंको माकलबारीबाट बिहीबार पक्राउ गरेको हो । लामाले २०७० वैशाख ३१ मा पुनरावेदन अदालत पाटनबाट उक्त सजाय पाएका थिए । उनीविरुद्ध शिवबहादुर खड्काले अपहरण मुद्दामा जाहेरी दिएका थिए ।
खड्कालाई ०६७ वैशाख १६ मा जोरपाटीस्थित सुवर्ण खड्काको घरमा लामा सहितका व्यक्तिहरुले जग्गाको कमिसन नदिएको भनी बन्धक बनाए पनि सोही वर्ष जेठ ७ मा प्रहरीले मुक्त गर्न सफल भएको थियो ।
आज उनलाई केन्द्रीय कारागार सुन्धारा पठाइएको प्रहरीले जनाएको छ ।