- २०८१ बैशाख २७ बिहीबार
काठमाडौं । सन्दीप लामिछाने विश्वकप क्वालिफायर अघि दक्षिण अफ्रिकामा हुने अभ्यास खेलमा अनुपस्थित हुने भएका छन् ।
जिम्बाव्वेमा हुने एकदिवशीय विश्वकप क्वालिफायरका लागि नेपाली राष्ट्रिय क्रिकेट टिम मंगलबार राति दक्षिण अफ्रिका प्रस्थान गर्दैछ ।
बलात्कारको आरोपमा सन्दीप लामिछानेविरुद्धको मुद्धाको फैसला नआएपछि उनी दक्षिण अफ्रिका भ्रमणमा अनुपस्थित भएका हुन् ।
क्यान स्रोतका अनुसार अदालतको प्रक्रिया नटुंगिएसम्म सन्दीपको वैदेशिक भ्रमण अनिश्चित भएको छ ।
विश्वकप क्वालिफायर खेल्ने १६ सदस्यीय टिममा रहेपनि अब क्यानले सन्दीपको अदालती प्रक्रिया पुरा भएपछि मात्र टिममा समावेश गर्ने तयारी गरेको छ ।
सन्दीपले पनि आजराती दक्षिण अफ्रिका जाने तयारी गरेको टिमलाई बधाई तथा शुभकामना दिएका छन् । उनले आफुलाई टिमप्रति विश्वास रहेको भन्दै फेरी एक पटक आफ्नो क्षमता देखाउने बेला आएको उल्लेख गरेका छन् ।
नेपाली क्रिकेट टिमले दक्षिण अफ्रिकामा स्थानीय टिमहरुसँग चार अभ्यास खेल खेल्नेछ र उतैबाट नेपाली टिम जिम्बाव्वे प्रस्थान गर्नेछ । नेपालले जिम्बाबेमा ३० र ३२ जेठमा ओमान र यूएईसँग अभ्यास खेल खेल्ने तालिका रहेको छ ।
विश्वकप क्वालिफायर भने असार ३ गतेदेखि सुरु हुनेछ । नेपालले पहिलो खेलमा टेष्ट मान्यताप्राप्त घरेलु टिम जिम्बाबेसँग खेल्दै छ भने दोस्रो खेल असार ५ मा अमेरिकासँग, असार ७ मा वेष्टइण्डिजसँग र असार ९ मा नेदरल्याण्ड्ससँग खेल्ने तालिका रहेको छ ।
