- २०८१ बैशाख १५ शनिबार
काठमाडौँ । बेलायतका राजा चार्ल्सलाई क्यान्सर भएको छ । राजा चार्ल्सले हालै प्रोस्टेटको उपचार गराइरहेका बेला उनलाई क्यान्सर भएको खुलासा भएको हो ।
बकिङ्घम प्यालेसले राजा चार्ल्सको सोमबारदेखि नियमित उपचार सुरु गरेको र उपचारका क्रममा सार्वजनिक जिम्मेवारीबाट टाढा रहने जनाएको छ । बकिङ्घम प्यालेसको विज्ञप्ति अनुसार राजा चार्ल्स उपचारको बारेमा पूर्ण रूपमा सकारात्मक छन् र सकेसम्म चाँडो आफ्नो सार्वजनिक जिम्मेवारीमा फर्कनेछन् ।
राजा चार्ल्सलाई कुन स्टेजको क्यान्सर भयो भन्ने जानकारी दिइएको छैन । राजा चार्ल्स आफैले आफ्ना दुई छोरा प्रिन्स ह्यारी र प्रिन्स विलियमलाई यो रोगको बारेमा बताइसकेका छन् । प्रिन्स अफ वेल्स विलियम आफ्ना पितासँग निरन्तर सम्पर्कमा रहेको बताइएको छ ।
ड्युक अफ ससेक्स राजकुमार ह्यारी अमेरिकामा बस्छन् । ह्यारीले आफ्नो बुबासँग कुरा गरिसकेका छन् र आगामी दिनहरूमा उनी आफ्नो बुबालाई भेट्न बेलायत आउने बताइएको छ । राजा चार्ल्स सोमबार नोर्फोकबाट लन्डन फर्केका थिए । बकिङ्घम प्यालेसले राजा चार्ल्सलाई बाहिरी बिरामीको रूपमा व्यवहार गरिने जनाएको छ । यसको मतलब उनी अस्पतालमा भर्ना भएर उपचार भने गराउने छैनन् ।
यद्यपि, राजा चार्ल्सले सार्वजनिक समारोहमा भाग लिने छैनन् । उनले सरकार प्रमुखको हैसियतमा संवैधानिक दायित्व निर्वाह गरिरहनेछन् । यसमा कागजी कार्य र व्यक्तिगत बैठकहरू पनि समावेश हुनेछन् ।
त्यस्तै राजा चार्ल्सको प्रधानमन्त्री ऋषि सुनकसँग साप्ताहिक भेटघाट जारी रहनेछ । ऋषि सुनकले पनि राजा चार्ल्सको स्वास्थ्यलाभको लागि प्रार्थना गर्दै सामाजिक सञ्जालमा लेखेका छन्- राजा चार्ल्स पूर्ण शक्तिका साथ छिट्टै फर्कनेछन् भन्नेमा मलाई कुनै शंका छैन र मलाई थाहा छ सम्पूर्ण देश उनको स्वास्थ्यलाभको लागि प्रार्थना गरिरहेको छ । राजाले आफ्नो आधिकारिक जिम्मेवारी पूरा गर्न नसकेमा त्यसको लागि संविधानमा व्यवस्था छ । यदि यस्तो भयो भने, यो जिम्मेवारी राजाको स्थानमा राज्यका सल्लाहकारहरूलाई दिन सकिन्छ ।
हाल रानी क्यामिला, प्रिन्स विलियम, राजकुमारी रोयल र प्रिन्स एडवर्ड यसमा सामेल छन् । राजा चार्ल्सलाई क्यान्सर भएको खबर बेलायती अखबारको पहिलो पृष्ठमा प्रकाशित गरिएको छ ।
अष्ट्रेलियाका प्रधानमन्त्री एन्थोनी अल्बानीजले पनि राजा चार्ल्सको शीघ्र स्वास्थ्यलाभको कामना गर्दै यस सम्बन्धमा बकिङ्घम प्यालेसलाई पत्र लेख्ने बताएका छन् । अमेरिकी राष्ट्रपति जो बाइडेनले पनि राजा चार्ल्सलाई क्यान्सर भएको पत्ता लगाएर राजा चार्ल्सको शीघ्र स्वास्थ्यलाभको कामना गरेको पोस्ट लेखेका छन् ।
