- २०८३ श्रावण १२ मंगलबार
2026-06-26-05-49-27.jpeg)
काठमाडौँ । अमेरिकाको यमनका हुथी विद्रोहीहरूमाथि आक्रमण गर्ने गोप्य योजना लिक भएको विषय बाहिर आएको छ ।
यो गोप्य योजना एक सुरक्षित एपको समूह च्याटमा साझा गरिएको थियो । यस ग्रुपमा अमेरिकी सरकारका उच्च अधिकारीहरू साथै एक अमेरिकी पत्रिकाका सम्पादक पनि जोडिएको पाइएको छ । सो ग्रुपमा यो योजना साझा हुने बित्तिकै, सम्पादकले आफ्नो पत्रिकामा यसको बारेमा समाचार प्रकाशित गरेको बताइएको छ ।
ग्रुप च्याटमा साझा गरिएको गुप्तचर जानकारीमा यमनमा हुथीहरूमाथि गरिएको आक्रमणको सञ्चालन विवरण, प्रहार गरिने लक्ष्यहरूको विवरण, प्रयोग गरिने हतियारहरू र आक्रमणहरू गर्ने तरिका उल्लेख गरिएको थियो । मार्च १५ मा, सुरक्षित एपमा समूह च्याटमा यो जानकारी साझा गरिएको दुई घण्टा पछि, अमेरिकाले यमनमा हुथी विद्रोहीहरूको अड्डाहरूमा आक्रमण गर्न थालेको थियो । यसबारे राष्ट्रपति ट्रम्पलाई सोध्दा उनले यसबारे कुनै जानकारी नभएको बताएका छन् ।
अमेरिकी सुरक्षा परिषद्ले एक विज्ञप्ति जारी गर्दै शीर्ष नेतृत्वको ग्रुप च्याटमा पत्रकारलाई कसरी र कसले जोड्यो भन्ने बारेमा अनुसन्धान गरिरहेको बताएको छ । यस समूह च्याटमा अमेरिकी रक्षामन्त्री बाहेक उपराष्ट्रपति जेडी भान्स, विदेशमन्त्री मार्को रुबियो, गुप्तचर विभागका निर्देशक तुलसी गब्बार्ड समावेश छन् । ती पत्रकारलाई राष्ट्रिय सुरक्षा सल्लाहकार माइक वाल्ट्जले सिग्नल एपमा हुने ग्रुप च्याटमा सामेल हुन आमन्त्रित गरेको दाबी गरिएको छ । माइक वाल्ट्ज आफैं यो समूह च्याटमा जोडिएका छन् । यसका लागि ट्रम्प प्रशासनको आलोचना भइरहेको छ र यस्तो गोप्य र महत्त्वपूर्ण जानकारी ग्रुप च्याटमा किन साझा गरियो भन्दै आलोचना भइरहेको छ ।
