- २०८३ बैशाख १४ सोमबार
काठमाडौँ । युद्धविराम जारी रहेकै बीच लेबनानमा भएका इजरायली आक्रमणमा १४ जनाको मृत्यु भएको छ । मृत्यु हुनेमा दुई बालबालिका र दुई महिला पनि रहेका छन्। साथै ३७ जना घाइते भएका छन्।
लेबनानको स्वास्थ्य मन्त्रालयका अनुसार यो आक्रमण आइतबार भएको हो । दुवै देशबीच गत बिहीबार मात्रै युद्धविराम थप तीन साताका लागि लम्ब्याइएको थियो ।
सम्झौताअनुसार इसराइललाई आफ्नो सुरक्षाका लागि आवश्यक ठाने जुनसुकै बेला कदम चाल्ने अधिकार दिइएको छ।
आक्रमणअघि इसराइली रक्षा बलका प्रवक्ताले दक्षिणी लेबनानका धेरै गाउँका बासिन्दालाई तत्काल स्थान छाड्न चेतावनी दिएका थिए। उनले त्यहाँ बसिरहनु ज्यानका लागि खतरनाक हुने बताएका थिए।
इजरायलका प्रधानमन्त्री बेन्जामिन नेतान्याहूले इसराइली रक्षा बल सक्रिय रहेको र बलियो रूपमा कारबाही गरिरहेको बताएका छन् । उनले हिज्बुल्लाहका गतिविधिले युद्धविराम उल्लंघन गरिरहेको आरोप पनि लगाएका छन्।
