- २०८३ बैशाख २० आइतबार
काठमाडौँ । चीनले इरानी तेल किन्ने पाँच कम्पनीमाथि अमेरिकाले लगाएको प्रतिबन्ध नमान्ने स्पष्ट पारेको छ ।
चीनको वाणिज्य मन्त्रालयले ती प्रतिबन्धले अन्य देशसँग सामान्य आर्थिक तथा व्यापारिक गतिविधि सञ्चालन गर्न चिनियाँ कम्पनीहरूलाई अवरोध गर्ने उल्लेख गरेको छ । मन्त्रालयले यसलाई अन्तर्राष्ट्रिय कानुन र अन्तर्राष्ट्रिय सम्बन्धका आधारभूत सिद्धान्तको उल्लंघन भएको जनाएको छ।
मन्त्रालयका अनुसार चीनले यस्ता अमेरिकी प्रतिबन्धलाई मान्यता नदिने र चिनियाँ कम्पनी तथा संस्थाहरूले पनि ती लागू गर्न नपर्ने बताइएको छ । साथै, संयुक्त राष्ट्रसंघको स्वीकृति बिना र अन्तर्राष्ट्रिय कानुनमा आधारित नभएका एकपक्षीय प्रतिबन्धको चीनले सधैँ विरोध गर्ने स्पष्ट गरिएको छ ।
यसअघि शुक्रबार मात्र अमेरिकाले अर्को एक चिनियाँ कम्पनीमाथि पनि प्रतिबन्ध लगाएको थियो । अमेरिकाले उक्त कम्पनीले इरानबाट लाखौँ ब्यारेल कच्चा तेल आयात गरी इरानलाई अर्बौँ डलर आम्दानी गराएको आरोप लगाएको थियो ।
तर चीनको वाणिज्य मन्त्रालयले आफ्नो वक्तव्यमा उक्त कम्पनीको नाम खुलाएको छैन । उल्लेखनीय छ, अमेरिकाले लगाएका यी प्रतिबन्धहरू राष्ट्रपति डोनाल्ड ट्रम्पको यही महिनाभित्र चीन भ्रमण र चिनियाँ राष्ट्रपति सी चिनफिङसँग हुने भेटअघि सार्वजनिक भएका हुन् ।
