- २०८३ जेठ ३ आइतबार
काठमाडौँ । भेनेजुएलाको राजनीतिक घटनाक्रम फेरि तनावपूर्ण बनेको छ । अपदस्थ राष्ट्रपति निकोलस मादुरोका निकट सहयोगी तथा पूर्व उद्योगमन्त्री एलेक्स साबलाई अमेरिकामा सुपुर्दगी गरिएको छ ।
एलेक्स साब धनी व्यवसायी हुन् र कोलम्बियामा जन्मिएका थिए । उनलाई मादुरोको अत्यन्त नजिकका सहयोगीमध्ये एक मानिन्छ ।
यसअघि फेब्रुअरीमा काराकासमा अमेरिकी र भेनेजुएला अधिकारीहरूको संयुक्त कारबाहीमा उनलाई पक्राउ गरिएको थियो । उनीमाथि लगाइएका आरोपबारे भने हालसम्म स्पष्ट जानकारी सार्वजनिक गरिएको छैन ।
यसअघि सन् २०२० मा एलेक्स साबलाई पश्चिम अफ्रिकी देश केप भर्डेमा पक्राउ गरिएको थियो । त्यतिबेला उनीमाथि मनी लाउन्डरिङ (अवैध धन शुद्धीकरण) को आरोप लागेको थियो र उनलाई अमेरिकामा सुपुर्द गरिएको थियो । तर तीन वर्षपछि उनीलाई माफी दिइएको थियो ।
यसैबीच, गत जनवरीमा अमेरिकाले भेनेजुएलामा विशेष सैन्य अभियान सञ्चालन गर्दै निकोलस मादुरोलाई पक्राउ गरी अमेरिकामा लगेको दाबी गरिएको थियो ।
अमेरिकामा अदालत सुनुवाइका क्रममा मादुरोले आफूलाई भेनेजुएला गणराज्यको राष्ट्रपति भएको भन्दै आफूलाई घरबाट अपहरण गरेर लगिएको दाबी गरेका थिए । उनले आफूलाई काराकासस्थित घरबाटै पक्राउ गरिएको बताएका थिए ।
