- २०८३ जेठ १४ बिहीबार
काठमाडौँ । इन्डियन प्रिमियर लिग (आइपिएल) को इलिमिनेटर खेलमा राजस्थान रोयल्सले सनराइजर्स हैदराबादसँग प्रतिस्पर्धा गर्दा सबैको ध्यान १५ वर्षीय युवा ब्याटर वैभव सूर्यवंशीमाथि केन्द्रित रह्यो । बिहारका विस्फोटक ब्याटर सूर्यवंशीले यस खेलमा कीर्तिमानी प्रदर्शन गर्दै टी–२० क्रिकेटका महान् ब्याटर क्रिस गेलको ऐतिहासिक कीर्तिमान तोडेका छन् ।
हैदराबादविरुद्ध आक्रामक ब्याटिङ गरेका सूर्यवंशी एकै संस्करणमा सर्वाधिक छक्का प्रहार गर्ने ब्याट्सम्यान बनेका छन् । यसअघि क्रिस गेलले सन् २०१२ मा ५९ छक्का प्रहार गरेका थिए । सूर्यवंशीले त्यस कीर्तिमानलाई पछि पार्दै नयाँ इतिहास रचे । उनले यस खेलमा १२ छक्का प्रहार गर्दै कुल ६५ छक्का प्रहार गरेर नयाँ किर्तिमान बनाएका छन् ।
त्यस्तै २०१९ सिजनमा आन्द्रे रसेलले ५२ छक्का प्रहार गरेका थिए भने क्रिस गेलले नै २०१३ मा ५१ छक्का प्रहार गरेका थिए । त्यसैगरी जोस बटलरले २०२२ मा ४५ छक्का प्रहार गरेका थिए ।
त्यसैगरी सुर्यबंशीले यस खेलमा १६ बलमा आफ्नो अर्धशतक पुरा गरेका थिए । यससँगै सूर्यवंशी इन्डियन प्रिमियर लिगमा २० बलभन्दा कममा सर्वाधिक पटक अर्धशतक बनाउने संयुक्त दोस्रो ब्याटर बनेका छन् । उनले निकोलस पुरनको बराबरी गरेका हुन् । दुवैले पाँच–पाँच पटक २० बलभन्दा कममा अर्धशतक पूरा गरेका छन् । यस सूचीको शीर्ष स्थानमा हैदराबादका ओपनर अभिषेक शर्मा छन्, जसले छ पटक यस्तो उपलब्धि हासिल गरेका छन् ।
१५ वर्षीय सूर्यवंशी पावरप्लेभित्र सर्वाधिक पटक ५० भन्दा बढी रन बनाउने दोस्रो ब्याटर पनि बने । उनले पाँचौँ पटक पहिलो ६ ओभरभित्र ५० भन्दा बढी रन बनाएका हुन् । यस क्रममा उनले ट्राभिस हेडलाई पछि पारे, जसले चार पटक यस्तो प्रदर्शन गरेका थिए । यस सूचीको शीर्ष स्थानमा डेविड वार्नर रहेका छन् । उनले छ पटक पावरप्लेमा ५० भन्दा बढी रन बनाएका छन् ।
सनराइजर्स हैदराबादविरुद्धको इलिमिनेटर खेलमा सूर्यवंशी ऐतिहासिक उपलब्धिबाट भने एक बलले चुके । उनले क्रिस गेलको सबैभन्दा छिटो शतकको कीर्तिमान तोड्ने अवसर गुमाए । प्रफुल्ल हिंगेको बलमा क्याच आउट भएपछि उनी शतक बनाउन असफल भए ।
आइपिएलमा सबैभन्दा छिटो शतक बनाउने कीर्तिमान क्रिस गेलकै नाममा छ । उनले ३० बलमा शतक पूरा गरेका थिए । सूर्यवंशी त्यस कीर्तिमान तोड्न निकै नजिक पुगेका थिए । तर, २९ बलमा पाँच चौका र १२ छक्काको सहयोगमा ९७ रन बनाएर उनी पेभेलियन फर्किए । उनको स्ट्राइक रेट ३३४.४८ रहेको थियो ।
यस खेलमा सूर्यवंशीले अर्को ठूलो उपलब्धिसमेत हासिल गरे । उनी इन्डियन प्रिमियर लिगको नकआउट वा प्लेअफ खेलमा सबैभन्दा कम बलमा अर्धशतक बनाउने संयुक्त पहिलो ब्याटर बने । उनले सुरेश रैनाको बराबरी गरेका हुन् । दुवैले १६ बलमा अर्धशतक पूरा गरेका छन् ।
