आज विश्व फिजियोथेरापी दिवस मनाइदै

काठमाडौँ । स्वास्थ्य तथा शारीरिक गतिशीलतामा फिजियोथेरापिस्टले पुर्‍याउने महत्वपूर्ण योगदानबारे जनचेतना फैलाउने उद्देश्यले हरेक वर्ष सेप्टेम्बर ८ मा विश्व फिजियोथेरापी दिवस मनाइन्छ ।

सन् १९९६ देखि मनाउन थालिएको यो दिवस विश्व फिजियोथेरापी संस्थाले प्रवर्द्धन गर्दै आएको छ । दिवसले मानिसलाई चलायमान, स्वस्थ र आत्मनिर्भर बनाउन फिजियोथेरापिस्टको भूमिकाबारे जनचेतना अभिवृद्धि गर्ने अवसर प्रदान गर्दछ ।

यस बर्षको विश्व फिजियोथेरापी दिवसको मुख्य विषय ‘हृदय तथा रक्तनलीसम्बन्धी रोग र पक्षघातको रोकथाम, व्यवस्थापन तथा पुनःस्थापनामा फिजियोथेरापी र शारीरिक गतिविधिको भूमिका’ रहेको छ ।

दिवसका अवसरमा विभिन्न देशमा फिजियोथेरापीको महत्व तथा स्वास्थ्य र शारीरिक गतिशीलता सुधारमा फिजियोथेरापिस्टले पुर्‍याउँदै आएको योगदानबारे जनचेतनामूलक कार्यक्रम आयोजना गरिँदै आएको छ ।