- २०८३ कार्तिक २६ बिहीबार
काठमाडौँ । इंग्लिस क्लब म्यानचेस्टर युनाइटेडको मुख्य प्रशिक्षक बन्न अर्जेन्टिनाका माउरिसियो पोचेटिनो तयार देखिएका छन् ।
क्लबले वर्तमान प्रशिक्षक माइकल क्यारिकलाई हटाउने तयारी गर्दै पोचेटिनोसँग छलफल अघि बढाएको छ ।
अमेरिकी राष्ट्रिय टोलीका प्रशिक्षकसमेत रहेका ५४ वर्षीय पोचेटिनोले जिम्मेवारी स्वीकार गर्ने तय भएको छ । उनलाई अमेरिकी टोलीको सम्झौताबाट मुक्त गर्न म्यानचेस्टर युनाइटेडले १ करोड अमेरिकी डलर तिर्नुपर्ने बताइएको छ।
क्लबले क्यारिकको भविष्यबारे निर्णय गर्ने र उनको स्थानमा पोचेटिनोलाई भित्र्याउने तयारि गरेको छ ।
प्रिमियर लिगका सुरुवाती १० खेलमध्ये एकमा मात्रै जित निकालेको युनाइटेड अहिले रेलिगेसन क्षेत्रमा १८औँ स्थानमा छ । सन् १९८६–८७ यताकै लिगको यस चरणमा क्लबको यो सबैभन्दा कमजोर स्थान हो ।
पोचेटिनोले यसअघि साउथह्याम्पटन, टोटनहम, पिएसजी र चेल्सीको प्रशिक्षकका रूपमा काम गरिसकेका छन् । उनको नेतृत्वमा टोटनहम सन् २०१९ मा च्याम्पियन्स लिगको फाइनलमा पुगेको थियो ।
उनले सन् २०२४ सेप्टेम्बरदेखि अमेरिकी राष्ट्रिय टोलीको जिम्मेवारी सम्हाल्दै आएका छन्। अमेरिकालाई सन् २०२६ को विश्वकपको अन्तिम १६ सम्म पुर्याएका पोचेटिनोको युनाइटेड आगमनबारे अब औपचारिक निर्णय हुन बाँकी छ ।
