- २०८३ कार्तिक २१ शनिबार
काठमाडौं । बैंक धराशायी भएपछि उत्पन्न वित्तीय संकटको जिम्मेवारी विवादमा तानिएका पाराग्वेका राष्ट्रपति सान्टियागो पेना पदबाट हटाइएका छन् । संसद्ले महाभियोग प्रस्ताव पारित गरेपछि उनलाई पक्राउ गरी नजरबन्दमा राखिएको छ ।
राष्ट्रपतिसँग सम्बन्ध रहेको निजी व्यावसायिक समूहसँग जोडिएको युएनो बैंक यसै साता धराशायी भएपछि पाराग्वेमा ठूलो वित्तीय संकट उत्पन्न भएको थियो । बैंक बन्द भएपछि देशको आधाभन्दा बढी जनसङ्ख्या आफ्नो बैंक खातामा रहेको बचत तथा रकम निकाल्नबाट वञ्चित भएको छ । करिब ३० लाख निक्षेपकर्ता प्रभावित भएको समाचारमा उल्लेख छ ।
शुक्रबार राष्ट्रपतिलाई पदबाट हटाउने प्रस्तावमा आफ्नै दलका सांसदसहित ४५ मध्ये ४४ सांसदले समर्थन गरेका थिए । एक सांसद अनुपस्थित थिए । राष्ट्रपतिले बिहीबार नै पदबाट राजीनामा दिने प्रस्ताव गरे पनि सिनेटले राजीनामा स्वीकार गर्नुको सट्टा महाभियोग लगाएर पदमुक्त गरेको थियो ।
महाभियोगमा राष्ट्रपतिमाथि स्वार्थको द्वन्द्व, नियामक निकायको निगरानी प्रक्रियामा हस्तक्षेप, निवृत्तिभरण कोषको रकम दुरुपयोग र केन्द्रीय बैंकसँग जोडिएको संस्थागत अनियमितता लुकाउने प्रयास गरेको आरोप लगाइएको छ । पेनाले भने आफूले कुनै गलत काम नगरेको दाबी गर्दै आएका छन् । अभियोजनकर्ता सिल्भिया मार्गारिटा गोन्जालेज भेस्टरका अनुसार राष्ट्रपतिमाथि विश्वासघात, प्रभावको दुरुपयोग र रकम हिनामिनासम्बन्धी आरोपमा शनिबार सोधपुछ गर्ने तयारी गरिएको छ । पेनाका कानुन व्यवसायी रिकार्डो प्रेदाले आरोपलाई गैरजिम्मेवार र अवसरवादी भन्दै अस्वीकार गरेका छन् ।
राष्ट्रपतिका उपप्रमुख पेद्रो अलियानाले अन्तरिम राष्ट्रपतिका रूपमा शपथ लिएका छन् । उनले सन् २०२८ सम्म कार्यभार सम्हाल्नेछन्। बैंक संकटबाट प्रभावित नागरिकको बचत रकम पूर्ण रूपमा क्षतिपूर्ति गर्ने प्रतिबद्धता पनि उनले व्यक्त गरेका छन् ।
बैंक बन्द भएपछि राजधानी असुनसियोनसहित देशका विभिन्न स्थानमा हजारौँ नागरिकले आफ्नो बचत रकम फिर्ता माग्दै प्रदर्शन गरेका थिए । केही प्रदर्शनमा प्रहरी र प्रदर्शनकारीबीच झडपसमेत भएको थियो। प्रहरीले अश्रुग्यास र पानीको फोहोरा प्रयोग गरेको समाचारमा उल्लेख छ ।
सिनेटका अध्यक्ष बासिलियो नुनेजले पेनालाई जिम्मेवारी निर्वाहमा असफल ठहर गरिएको बताएका छन् । सिनेटर राफेल फिलिजोलाले यसलाई देशको लोकतान्त्रिक इतिहासकै ठूलो भ्रष्टाचार प्रकरणमध्ये एक भन्दै राज्य र नागरिकको विश्वासमा गम्भीर असर परेको बताएका छन् ।
