- २०८१ बैशाख २१ शुक्रबार
पाल्पा। सरकारको उच्चस्तरीय वार्ता टोलीका संयोजक सोमप्रसाद पाण्डेले विप्लव नेतृत्वको नेकपासहितका सबै बिद्रोही समुहसँग वार्ताका लागि पहल भइरहेको बताएका छन् ।
उनले विप्लव समुहलाई वार्ताबाट समाधानमा आउन आग्रह भएको र छिटै नै वार्ता हुने पनि जानकारी दिएका हुन् । उनले मुलुकका सबै विद्रोही समूह र पार्टीसँग वार्ता हुने बताए ।
प्रेस चौतारी र प्रेस सेन्टरले राखेको संयुक्त कार्यक्रममा पाण्डेले अब नेपालमा हिंसात्मक विद्रोही पक्ष भन्ने नै नरहन पनि बताए । उनले सरकारले गम्भीरताकासाथ सबै पक्षसँग सम्वाद गरिरहेको जनाए । असन्तुष्ट पक्षलाई वार्तामा आउन र सबै माग वार्ताबाट नै पुरा हुने पनि बताए ।
‘विद्रोही गतिविधि गर्ने पार्टी र समूहसँग वार्ताका लागि छलफल चलिरहेको छ । प्रधानमन्त्री र गृहमन्त्रीसँग कुरा भयो । अब केही दिनमा त्यसको नतिजा आउने छ’ उनले भने ।अहिले नेपालमा हिंसात्मक गतिविधि गर्ने मनसायका २३ वटा समूह रहेको र त्यसमध्ये चार समूहसँग छलफल चलिरहेको उनले बताए ।
केही समूह हतियार बुझाउन पनि तयार भएको उनले जानकारी दिए । ‘मुलुकमा हिंसात्मक गतिविधि गर्ने मनसायका अन्यको पनि पहिचान गर्ने प्रयासमै छौ । सबैको पहिचान गरी वार्ता हुन्छ’ उनले बताए । सबैभन्दा ठूलो संगठनको रूपमा रहेको विप्लव नेतृत्वको नेकपासँग पनि वार्ताको लागि पहल भइरहेको पाण्डेले बताए ।
