कपिलवस्तुको कृष्णनगरमा दुर्गा मूर्ति विसर्जनका क्रममा विवाद, प्रशासनद्वारा कर्फ्यू जारी 

खरीबोट

तौलिहवा। कपिलवस्तुको कृष्णनगरमा नवदुर्गा पूजाको मूर्ति विर्सजनका क्रममा विवाद उत्पन्न भएको छ । कृष्णनगर बजारभित्र नवरात्रभर पूजा गरिएका मूर्तिलाई विसर्जन गर्न लैजाने क्रममा बाटोमा विवाद सिर्जना भएको थियो । 

शनिबारदेखि सुरु भएको विवाद आइतबार दिनभर कायम रह्यो । स्थानीय हिन्दु समुदाय र मुस्लिम समुदायबीच विवाद बढ्दै गएपछि जिल्ला प्रशासन कार्यालय कपिलवस्तुले आइतबार साँझ ५ बजेदेखि कर्फ्यू लगाएको छ । 

प्रमुख जिल्ला अधिकारी अर्जुनप्रसाद पोखरेलले भारतीय सीमा क्षेत्रको बजार कृष्णनगर  क्षेत्रमा शान्ति सुव्यवस्था कायम गर्न ५ बजेदेखि कर्फ्यू लगाएको जानकारी दिए । 

प्रशासनले कार्तिक ४ गते साँझ ५ बजेदेखि कृष्णनगर बजारको दक्षिण क्षेत्र नेपाल–भारत दशगजा, उत्तरतर्फ कृष्णनगर–१ शिवानगरको बढाया पोखरीक्षेत्र, पूर्व सेमरा गाउँ र पश्चिम सिर्सिहवा चोकसम्म कर्फ्यू लगाउने निर्णय गरेको हो ।

कर्फ्यूको समयमा कसैलाई पनि घर बाहिर निस्कन, आवत जावत गर्न, भेला हुन, जुलुस निकाल्न तथा हुलदंगा गर्न नपाउने गरी स्थानीय प्रशासन ऐन २०२८ को दफा ६ क (१) बमोजिम  आदेश जारी गरिएको जिल्ला प्रशासन कार्यलयले जनाएको छ । 

मूर्तिविसर्जन गर्न लैजाने क्रममा भिडियो खिच्दै गरेका केही मुस्लिम समुदायका युवा र भिडियो खिच्न रोक्न खोज्ने हिन्दु समुदायका युवाहरु बीच विवाद उत्पन्न भएको थियो । मुस्लिम समुदायका स्थानीय युवाले मूर्तिविसर्जनका बेला भइरहेको जात्रा र नाचको भिडियो खिचिरहेका थिए। 

कृष्णनगरमा अवस्थित नैमिया मस्जिद अगाडी ती मुस्लिम युवाले दुर्गा मूर्तीको भिडियो बनाएका खिचेका थिए । सोही भिडियो खिच्दै गरेको अवस्थामा हिन्दु समुदायका केही युवाले भिडियो नलिन आग्रह गरेका थिए । आग्रहलाई मुस्लिम समुदायका युवाले नमानेको भन्दै हिन्दु समुदायका युवा आक्रमणमा उत्रेपछि विवादले उग्ररुप लिएको बताइएको छ । पछि दुर्गा विसर्जन गर्न हिडेकामाथि मुस्लिम समुदायका केही युवाले ढुङ्गा प्रहार गर्न थालेपछि शनिबार दोहोरो ढुङ्गा हानाहान भएको थियो । 

मूर्तिविसर्जनका क्रममा भएको विवाद दुवै पक्षका युवाको कमजोरीमा भएको र भिडियो खिच्ने र भिडियो नखिच्न आग्रह गर्ने दुवै पक्षका युवालाई पक्राउ गरी वातावरणलाई शान्त पार्न प्रहरीलाई पटक–पटक आग्रह गरेपनि प्रहरीले कुनै चासो नलिएको स्थानीयले गुनासो गरेका छन्  । 

विजया दशमीको भोलीपल्ट हरेक बर्ष त्यहाँका हिन्दु समुदायले दुर्गाको मूर्तिविसर्जन गर्दै आए पनि यसपालि रोकिन पुगेको छ । विवादले उग्ररुप लिएपछि जिल्लाबाट सुरक्षाकर्मी परिचालन गरिएको थियो ।

झडपबाट स्थानीय दुई युवा घाइते भएको प्रहरीले जनाएको छ । 

सामान्य विवाद साम्प्रदायिकतासँग जोडिन थालेपछि जिल्ला प्रशासन कार्यालयले सजकता अपनाएको छ। प्रशासनले राजनैतिक दल, भद्रभलाद्मीसँग बसेर सहमतिको बाटो खोज्ने प्रयास गरेको थियो । शनिबार साँझ मात्र प्रशासनले दुवै समुदायलाई राखेर सहमतिको प्रयास गरेको थियो ।
 

सम्बन्धित समाचार

उत्खननमा भेटिए गुप्तकालीन इँटा र नन्दी 

कपिलवस्तु। शिबराज नगरपालिका–३ स्थित ऐतिहासिकस्थल सोनवागढ क्षेत्रको उत्खननको काम शुरु भएको छ ।  लुम्बिनी विकासको पुरातत्व विभागले सोनवागढ क्षेत्रमा उत्खननको काम शुरु गरेको चौथो दिनसम्म विभिन्न गुप्तकालीन इँटाहरु भेटिएका छन् ।

कपिलवस्तुमा ट्याक्टर पल्टिँदा एक जनाको मृत्यु

कपिलवस्तु । ट्याक्टर पल्टिँदा कपिलवस्तु नगरपालिका–९ कुश्मामा गएराति एक जनाको मृत्यु भएको छ । मृत्यु हुनेमा स्थानीयवासी ४० वर्षीय श्याम यादव रहेका छन् । कुश्माघाटबाट कुश्मातर्फ आउँदै गरेको लु३त ५२१६ नं

कपिलवस्तुमा ट्रकको ठक्करबाट युवकको मृत्यु

तौलिहवा। पूर्व पश्चिम राजमार्गअन्तर्गत कपिलवस्तुको बुद्धभूमि नगरपालिका–२ हरकुर खोला नजीक ट्रकको ठक्करबाट एक जना युवकको मृत्यु भएको छ ।  भैरहवाबाट दाङतर्फ जाँदै गरेको ना६ख १२०१ नंको ट्रकको ठक्करबाट विपरीत दिशातर्फ जाँदै

कपिलवस्तुमा स्थानीय युवा नेताको गोली हानी हत्या 

कपिलवस्तु। शुक्रबार राति तीन जनाको समूहले शुद्धोधन गाउँपालिका वडा नम्बर–४, मोतीभारीका स्थानीय युवा नेता ३० वर्षीय दीपेन्द्रकुमार चौधरी(राजाबाबु) को गोली हानी हत्या गरेको छ । ३ जनाको समूहमा आएको व्यक्तिहरुले हानेको


z