- २०८१ बैशाख २४ सोमबार
काठमाडौँ । जेठ ३ गतेबाट प्रदर्शनमा आएको प्रदीप भट्टराई निर्देशित फिल्म ‘जात्रै जात्रा’ ले प्रदर्शनको दोस्रो सातामा पनि दर्शकको राम्रो साथ पाएको छ ।
फिल्मले आफ्नो पहिलो साताको आक्रामक व्यापारको क्रमलाई दोस्रो साता पनि निरन्तरता दिएको छ ।
पहिलो साता फिल्मले घरेलु बजारमा लगभग ४ करोड कलेक्सन गर्न सफल भएको निर्माण पक्षले जानकारी दिएका छन् । बलियो 'वर्ड अफ माउथ' का कारण फिल्मको व्यापारमा कमी नआएको देखिएको छ ।
खासगरी मल्टीप्लेक्सहरुले दोस्रो सातामा पनि पहिलो साताकै हाराहारीमा शोज उपलब्ध गराउनुले फिल्मको व्यापार आक्रामक रहेको देखाएको छ ।
२ करोडको लागतमा निर्माण भएको यस फिल्मले घरेलु बजारबाट लगानी सुरक्षित गर्न ५ देखि ६ करोडको आसपासमा व्यापार गर्नुपर्छ, जुन दोस्रो साताको केहि दिनमा नै कमाउने आँकलन गरिएको छ ।
यो फिल्मलाई दर्शकले निकै रुचाएका छन् । नेपालमा दर्शकले रुचाएका फिल्म समीक्षकलाई मन परेका उदाहरण भेट्न गाह्रै पर्छ । ‘जात्रै जात्रा’ ले भने दुबैलाई रिझाएको छ । फिल्म विश्लेषकहरुले पनि यस फिल्मलाई सार्थक सिक्वेलको रुपमा टिप्पणी गरेका छन् ।
पहिलो साताको आक्रामक व्यापारलाई फिल्मले दोस्रो साता पनि निरन्तरता दिएपछि निकै हौसिएको निर्माण टिम अहिले दर्शक भेट्न मौफसल दौडाहामा छ । केही दिन अगाडि पूर्वका विभिन्न हल पुगेर दर्शकसँग प्रत्यक्ष साक्षात्कार गरेका अभिनेता विपिन कार्की, अभिनेत्री वर्षा राउत, निर्देशक प्रदीप भट्टराई र निर्माता तथा कलाकार रविन्द्र सिंह बनियाँले शनिवार पोखरा र चितवन पुगेर दर्शकको प्रतिक्रिया बुझेका छन् ।
निर्देशक भट्टराईले सफल निर्देशकको रुपमा ह्याट्रिक पनि गरेका छन् । ‘जात्रै जात्रा’ को पहिलो भाग ‘जात्रा’ बाट निर्देशक भट्टराईले फिल्म निर्देशनमा डेब्यू गरेका थिए । यसपछि उनले फिल्म ‘शत्रु गते’ निर्देशन गरेका थिए ।
‘जात्रै जात्रा’ मा दयाहाङ राई, विपिन कार्की, रविन्द्र झा, रविन्द्र सिंह बानियाँ, वर्षा राउतलगायतका कलाकारहरुको अभिनय छ ।
