काठमाडौँ । नेपालको जलविद्युत् इतिहासमा कम्पनी ढाँचाबाट आयोजना निर्माण गर्ने श्रेय पाएको चिलिमे जलविद्युत् कम्पनीले आर्थिक वर्ष २०७५/०७६ को मुनाफाबाट शेयरधनीलाई २५ प्रतिशत लाभांश दिने प्रस्ताव गरेको छ ।
कम्पनीको आज बसेको सञ्चालक समितिको बैठकले ५ प्रतिशत नगद लाभांश र २० प्रतिशत शेयर लाभांश दिने प्रस्ताव गरेको कम्पनी सचिव नारायणप्रसाद आचार्यले जानकारी दिए ।
कम्पनीले २३ करोड ७९ लाख छ हजार ७ सय ८९ बराबरको नगद लाभांश र ९५ करोड १६ लाख २७ हजार १ सय ५६ बराबरको शेयर लाभांश वितरण गर्ने प्रस्ताव गरेको हो ।
कम्पनीको आगामी मङ्सिर ११ गते बस्ने २३ औँ वार्षिक साधारणसभाले उक्त प्रस्ताव पारित गर्ने छ । कम्पनीको हाल चुक्ता पूँजी चार अर्ब ७५ करोड ८१ लाख ३५ हजार ७ सय ७२ रहेको छ ।
कम्पनीका तीन सहायक कम्पनीले चार जलविद्युत् आयोजना निर्माण गरिरहेका छन् । कुल १ सय ११ मेगावाटको रसुवागढी, ४२.५ मेगावाट क्षमताको तल्लो साञ्जेन र १४.८ मेगावाटको माथिल्लो साञ्जेन र १ सय २ मेगावाट क्षमताको मध्य भोटेकोशी जलविद्युत् आयोजना निर्माण गरिरहेको छ ।
तीमध्ये साञ्जेन र रसुवागढी जलविद्युत् आयोजना निर्माणको अन्तिम चरणमा पुगेका छन् ।