- २०८१ बैशाख २० बिहीबार
काठमाडौँ । अफगानिस्तानको काबुलस्थित विमानस्थलको गेट बाहिर एक होटल नजिक भएको विस्फोटमा मृत्यु हुनेको संख्या ७० नाघेको छ ।
अमेरिकी रक्षा मन्त्रालय र अफगानिस्तानको स्वास्थ्य मन्त्रालयका अनुसार अमेरिकी सेवाका १३ जना र ६० अफगानीको विस्फोटमा मृत्यु भएको छ ।
२० मिनेटको अन्तरमा दुई विष्फोट भएको मिडिया रिपोर्टमा बताइएको छ । दुई आत्मघाती अज्ञात व्यक्तिले पहिला गोली चलाएर आफैलाई विस्फोट गरेको बताइएको छ ।
मृत्यु हुनेमा महिला र बच्चासमेत रहेका छन् । साथै कैयौं घाइते भएका छन् । घाइते हुनेमा तालिबानी लडाकु पनि रहेको बताइएको छ ।
अफगानिस्तानको स्वास्थ्य मन्त्रालयले विस्फोटमा १४० भन्दा बढी घाइते भएको जनाएको छ । जसमा ८ अमेरिकी सैनिक घाइते भएका छन् । अमेरिका, ब्रिटेन र अस्ट्रेलियाले यस अघि नै यस किसिमको विस्फोटको आशंका गरेर आफ्ना नागरिकलाई सतर्क रहन आग्रह गरेका थिए ।
घटना आइएसआइएसका मिलिटेन्टले गराएको बताइएको छ तर यसको औपचारिक पुष्टि भने भएको छैन ।
काबुल विस्फोटपछि बोल्दै अमेरिकी राष्ट्रपति जो बाइडेनले हमला गर्नेलाई जसरी पनि कारवाही गर्ने चेतावनी दिएका छन् ।
