डाबरका उत्पादनले क्यान्सर निम्त्याएको भन्दै अमेरिकामा मुद्धा दायर !

काठमाडौँ । डाबर इन्डियाका तीन सहायक कम्पनी नमस्ते ल्याबोरेटरीज एलएलसी, डर्मोभिवा स्किन एसेन्शियल्स इन्क र डाबर इन्टरनेशनलविरुद्ध अमेरिकी संघीय अदालतमा ५४ सयभन्दा बढी मुद्दा दायर भएका छन् ।

डाबरमाथि कपाललाई आराम दिने उत्पादनका कारण क्यान्सरजस्ता रोग निम्त्याएको आरोप लगाउदै मुद्धा दायर गरिएको मिडिया रिपोर्टमा उल्लेख गरिएको छ ।

यसबारे डाबर इन्डियाले अमेरिकी संघीय अदालतमा मुद्दाहरू प्रारम्भिक चरणमा रहेको र अहिले नै केही भन्न नसकिने बताएको भारतीय मिडियाहरुले उल्लेख गरेका छन् । कम्पनीले आफूमाथि लगाइएका सबै आरोप निराधार र अपूर्ण अध्ययनका आधारमा लगाइएको बताएको छ ।

नमस्ते प्रयोगशालाहरूले कपाल र छाला हेरचाह उत्पादनहरू उत्पादन गर्दछ । ब्रान्डले अमेरिकी बजारहरूमा ORS™ हेयरकेयर अन्तर्गत आरामदायी, तेल, स्याम्पु, हेयर क्रिम जस्ता उत्पादनहरू बिक्री गर्छ । डाबरले सन् २०१० मा यो कम्पनी अधिग्रहण गरेको थियो ।

डर्मोभिभा स्किन एसेन्शियल्सले आफूलाई हर्बल विज्ञ भन्ने गर्दछ । यसको कपाल सम्बन्धित उत्पादनहरूमा डन्ड्रफ गार्ड, कपाल झर्न नियन्त्रण गर्ने, नाइट रिपेरियर, भोल्युम एण्ड थिकनेस जस्ता उत्पादनहरू समावेश छन् । यसबाहेक डर्मोभिभाले अन्य धेरै उत्पादनहरू उत्पादन गर्छ ।

डाबर इन्टरनेशनल डाबर भारतको पूर्ण स्वामित्वमा रहेको सहायक कम्पनी हो र यसको मुख्यालय दुबईमा छ । डाबर १३० वर्षभन्दा पुरानो कम्पनी हो । यो १८८४ मा कोलकाताबाट सुरु भयो । डाबरले अमला हेयर आयल र वाटिका स्याम्पुलगायत उत्पादन गर्छ ।

यो प्रकरण बाहिर आएपछि डाबरको भारतीय शेयर बजार बिहीबार मात्र १.२२ प्रतिशतले घटेको छ । 

यस वर्षको सुरुमा डाबर इन्डियाको महमा क्यान्सर निम्त्याउने रसायन भएको दाबी गरिएको थियो । डाबरको महमा सिमाभन्दा बढी कार्सिनोजेनिक तत्व रहेको बताइएको छ । यसमा कम्पनीले आफ्ना उत्पादनहरु FSSAI मापदण्ड अनुसार बनेको बताएको थियो ।

यसअघि भारतमा पनि जोन्सन एन्ड जोन्सनको ट्याल्कका कारण क्यान्सरको खतरा रहेको आरोप लागेको थियो । भारत बाहेक युरोप र अमेरिकामा पनि जोन्सन एन्ड जोन्सनमाथि यी आरोप लागेका थिए र कम्पनिलाई ठुलो रकम जरिवाना गरिएको थियो भने कैयौं देशमा बिक्रि वितरण गर्न प्रतिबन्ध लगाइएको छ ।