- २०८३ असार २ मंगलबार
काठमाडौँ । जारी फिफा विश्वकप अन्तर्गत समूह ‘आई’ को पहिलो खेलमा इराक र नर्वे आमनेसामने हुँदैछन् । अमेरिकास्थित बोस्टन स्टेडियममा हुने यो खेल नेपाली समय अनुसार भोली बिहान ३: ४५ बजेदेखि शुरु हुदैछ ।
दुवै टोली प्रतियोगिताको सुरुआतमै जित निकाल्दै सकारात्मक सुरुआत गर्ने लक्ष्यमा छन् । नर्वे १९९८ पछि विश्वकपमा फर्किएको उत्साहका साथ मैदान उत्रँदैछ भने इराक पनि १९८६ चार दशकपछि विश्वकपमा पुनरागमन गरेको टोली हो ।
इराक पूर्ण रूपमा फिट टोलीसहित प्रतियोगितामा प्रवेश गरेको छ । मुख्य प्रशिक्षक ग्राहम आर्नोल्डसँग २६ सदस्यीय टोलीका सबै खेलाडी उपलब्ध छन्, जसले उनलाई आफ्नो बलियो टोली मैदानमा उतार्न सहज बनाएको छ । इराकी टोली अमेरिका पुगेपछि स्टार फरवार्ड आयमेन हुसेनलाई सिकागो विमानस्थलमा केही समय सोधपुछका लागि रोकिएको थियो । तर उनी पुनः टोलीमा फर्किसकेका छन्, नियमित प्रशिक्षण गरेका छन् र नर्वेविरुद्ध आक्रमणको नेतृत्व गर्नेछन्। उनको साथमा अली अल–हमादीले अग्रपंक्तिमा खेल्ने सम्भावना छ । मिडफिल्डमा पूर्व म्यानचेस्टर युनाइटेड युवा खेलाडी जिदान इकबालले अमिर अल अम्मारीसँग मिलेर सिर्जनात्मक भूमिका निभाउनेछन् । दायाँ-बायाँबाट अली जासिम र इब्राहिम बायेशले आक्रमणलाई गति दिने अपेक्षा गरिएको छ । रक्षापंक्तिमा गोलरक्षक जलाल हसनलाई हुसेन अली, जाइद तहसिन, रेबिन सुलाका र मर्चास दोस्कीले साथ दिनेछन् ।
यता नर्वे पनि पूर्ण रूपमा फिट टोलीसहित विश्वकप यात्रा सुरु गर्दैछ । टोलीका कप्तान तथा मिडफिल्डका मुख्य खेलाडी मार्टिन ओडेगार्डले आफू पूर्ण रूपमा तयार रहेको बताएका छन् । प्रशिक्षक स्तोले सोलबाकेनले पनि स्टार फरवार्ड इर्लिङ हालान्ड उत्कृष्ट शारीरिक अवस्थामा रहेको पुष्टि गरेका छन् । हालान्डले बोस्टनमा भएको अन्तिम प्रशिक्षण सत्रमा आकर्षक भली गोल गर्दै सबैको ध्यान तानेका थिए । नर्वेको आक्रमण निकै आक्रामक रहने अपेक्षा गरिएको छ । हालान्डसँगै अग्रपंक्तिमा अलेक्जान्डर सोरलोथ र एन्टोनियो नुसाले खेल्नेछन् । गोलपोस्टमा ओर्यान निलान्ड रहनेछन् भने रक्षापंक्तिमा जुलियन रियर्सन, क्रिस्टोफर आयर, टोर्ब्योर्न हेग्गेम र डेभिड मोलर वोल्फ रहने सम्भावना छ । मिडफिल्डमा सान्देर बेर्गे, फ्रेड्रिक अउर्स्नेस र ओडेगार्डको संयोजनले टोलीलाई थप बलियो बनाउनेछ ।
इराकले कठिन प्रतिस्पर्धामार्फत विश्वकपमा स्थान बनाएको हो । उसले प्लेअफमा बोलिभियालाई २–१ ले हराउँदै विश्वकप यात्रा तय गरेको थियो । त्यसपछि भएको मैत्रीपूर्ण खेलमा एन्डोरामाथि १–० को जित निकालेको थियो भने युरोपेली शक्तिशाली टोली स्पेनसँग १–१ को बराबरी खेलेको थियो । यद्यपि, पछिल्लो खेलमा भेनेजुएलासँग २–० ले पराजित हुँदा केही रणनीतिक कमजोरी देखिएको थियो ।
नर्वे भने उत्कृष्ट लयमा प्रतियोगितामा प्रवेश गरेको छ। उसले छनोट चरणमा प्रभावशाली प्रदर्शन गर्दै इटालीलाई उसैको मैदानमा ४–१ ले हराएर विश्वकप यात्रा सुनिश्चित गरेको थियो । जुन महिनाका अभ्यास खेलमा पनि स्विडेनलाई ३–१ ले पराजित गरेको थियो भने मोरक्कोसँग १–१ को बराबरी खेलेको थियो । टोली पछिल्ला तीन खेलमा अपराजित रहँदै उच्च आत्मविश्वासका साथ मैदान उत्रन लागेको छ ।
