जुत्ता (कविता)

लामो अन्तराल छिचोलेँ 
उसलाई सुनाउँन एउटा सुन्दर वाक्य-
म तिमीलाई प्रेम गर्छु

तर कत्ति पनि समय नलिई
भनिदई सीधै- तिम्रो स्थान त मेरो जीवनमा
जुत्ता जति मात्र छ
सायद देखाउनु थियो उसलाई 
मप्रति घृणा

तर म त खुसीले मात्तिएँ साह्रै
मैले बुझेको छु-
हेलिकप्टर प्रयोग गरि सगरमाथा चुम्ने
पर्वतारोही हुन सक्दैन
पर्वतारोही हुन त जमिनबाटै यात्रा गर्नुपर्छ
मभित्र प्रेमिल हृदय भएर होला
घृणामा पनि प्रेम देख्ने गर्छु
पुग्नु छैन एकैपटक उसको मन-मस्तिष्कमा
प्रेमको शिखर समय खर्चेर चढ्न चाहन्छु
पहिलो बेस क्याम्प त पार गरिसकेँ 
उसको जुत्ता जो भएको छु
अब बिस्तारै हुनेछु मोजा, पाइन्ट, पेटी, सर्ट, माला, लिपिस्टिक, नथिया, गाजल, टिका, टोपी..........
एकदिन पक्कै शिखर चुम्नेछु 
उसको सिन्दुर भएर